Estoniya mustaqilliginiñ 100 yıllığını qayd ete
Estoniya mustaqilliginiñ 100 yıllığını qayd ete. Devletniñ paytahtı Tallinde bayram tedbirleri ve parad ötkerile.
Bayraq köterüv merasimi vaqtında Estoniya parlamentiniñ reisi Eiki Nestor, Estoniyanıñ mustaqilligi şimdiki künde eñ yahşı qorçalanğan vaqti olğanını beyan etti.
«Bizim dost ve ittifaqdaşlarımız bar. Estoniya ür dünyanıñ bir parçası sayıla», – dedi o.
Arbiy paradnı Estoniya prezidenti Kersti Kaljulaid qabul etti. Anda hususan, Estoniyada yerleşken NATOnıñ çoqmilletli qısımları iştirak etti.
Estoniya mustaqilliginiñ 100 yıllığı ilân etilüvinen estoniyalılarnı Ukraina prezidenti Petro Poroşenko tebrikledi.
«Ukraina halqı adından bütün samimiyetimnen Estoniyanı ve dostane eston halqını mustaqilliginiñ 100 yıllığınen tebrikleyim. Estoniyağa muvafaqiyetler, barışıq ve bütün Avropa halqına abadanlıq tileyim», – dep yazdı Ukraina devletiniñ yolbaşçısı Twitterde.
Estoniya, özüniñ Litva ve Latviya kibi qomşu baltik devletleri kibi 1918 senesi mustaqilligi ilân etilgence, Rusiye imperiyasınıñ bir parçası dep sayıla edi. 1940 senesi Sovetler Birligi bu devletni işğal etip alğan edi. 1991 senesi avgust ayında o bir daa mustaqilligine qavuştı.
2004 senesi Estoniya AB ve NATOğa qoşuldı.