Мурофиаи додгоҳии президенти собиқи Қирғизистон Алмосбек Отамбоев, ки барои раҳоии ғайриқонунии як раҳбари гурӯҳи ҷиноӣ дар соли 2013 гунаҳгор мешавад, дар ғайби ӯ барпо мешавад. Отамбоеви боздоштшуда ин навбат ҳам ширкат дар мурофиаро рад кард. Сергей Слесарев, вакили дифои президенти собиқ гуфт, баъди он ки Отамбоев рӯзи 9 январ мурофиаи додгоҳиро, ки дар утоқи Кумитаи амнияти миллӣ барпо шуд, тарк кард, додрас қарор кард мурофиаро дар ғайби ҷавобгар барпо кунад. Қарори баргузории додгоҳ дар қароргоҳи Кумитаи давлатии амнияти миллӣ, ки Отамбоев он ҷо нигаҳдорӣ мешавад, рӯзи 19 декабр қабул шуд. Ин замоне буд, ки Отамбоев нахост дар мурофиаи додгоҳи ноҳияи Якуми майи шаҳри Бишкек ҳозир шавад. Вакилони дифои Отамбоев аз қарори дар берун аз сохтори додгоҳ барпо шудани мурофиа эътироз карданд.
Иттиҳоми Отамбоев ба озодшавии раҳбари созмони ҷиноӣ Азиз Ботукаев рабт мегирад, ки дар чандин ҷинояти сангин, аз ҷумла куштори як депутати қирғиз ва як мақоми вазорати умури дохилӣ гунаҳгор мешавад. Ба Отамбоев то 15 соли зиндон таҳдид мекунад.
Раиси ҷумҳурии собиқи Қирғизистон рӯзи 8 август баъди он боздошт шуд, ки давоми ду рӯз дар хонаи худ дар берун аз Бишкек ҳамроҳи тарафдоронаш ба нирӯҳои амниятӣ, ки барои боздошти ӯ рафта буданд, вориди ихтилоф шуд. Отамбоевро дар нақзи 13 моддаи Кодекси ҷиноӣ гумонбар мекунанд, ки дар миёни ин иттиҳомот ташкили куштор, ташкили беназмиҳои ҷамъиятӣ, гаравгонгирии афроди низомӣ дар хонааш дар моҳи август мебошанд.
