له ښځو سره د ناسم چلند له امله کندهار کې د پولیسو افسر نیول شوی
د کندهار د امنیه قوماندانۍ ویاند جمال ناصر بارکزي نن آزادۍ راډیو ته وویل چې جنايي پولیسو د سیدمحمد په نوم تورن افسر نیولی دی او دا مهال تحقیقات ترې کوي.
هغه زیاته کړه: "په عینو مېنه کې چې کومو پولیسو له ښځو سره بد چلند کړی و، یا یې د هغو مخونه په زور لوڅول، د امنیې قوماندان په امر د جنايي پولیسو راوست چې اوس مهال تر تحقیق لاندې دی."
دا اقدام پر ټولنیزو شبکو د هغې ویډیو له خپرېدو وروسته کېږي چې ظاهرا نوموړی افسر له ښځو سره د ناوړه چلند په حال کې ښيي.
دې ویډیو د ډېرو خلکو غبرګونونه وپارول.