Орус жарандыгы бар балдар Кыргызстанга киргизилди
28-апрелде Екатеринбург шаарынан учуп келген 157 жарандын ичинде өзү Орусиянын жараны, балдары Кыргызстандын жараны болгон жана балдары Орусиянын жараны, өзү Кыргызстандын жараны болгон эки аял болгон. Өзгөчө абал шартындагы мыйзамдарга ылайык, өлкөгө чет элдик жарандарды киргизүүгө тыюу салынганына байланыштуу алар балдары менен кошо Кыргызстанга киргизилген эмес. Бирок республикалык штабдагы кеңешмеде бул жарандарды өлкөгө киргизүү жөнүндө чечим чыккан.
«Бул маселе республикалык штабда каралды. Мыйзамдарга ылайык, өзгөчө абал шартында чет элдик жарандар өлкөгө киргизилбейт. Бирок бул жерде адамгерчилик маселеси биринчи орунга коюлуп, аларды өлкөгө киргизүү жөнүндө чечим кабыл алынды», деп айтылат маалыматта.
Социалдык тармактардагы маалыматтарга караганда, Орусиянын жараны болгон балдарды апасы 13-мартта Челябинск шаарындагы ооруканага алып барган. 45 күн аралыгында алар ар жерде көчүп-конуп жүрүшкөнү, акырында Кыргызстандын Екатеринбург шаарындагы башкы консулдугу аркылуу чартердик каттамга илинип, мекенине кайтып келишкени жазылган.
28-апрелде Орусиянын Екатеринбург шаарынан чартердик каттам менен 157 кыргызстандык жаран алынып келген.
Коронавирус пандемиясына байланыштуу Кыргызстан март айынын башында эле өлкө аймагына чет элдик жарандардын киришине тыюу салган. (ZKo)