2026 жылы қазақстандықтарға 112 млрд теңгеден астам сомада бала тууына және бала күтіміне байланысты жәрдемақылар төленді
2026 жылы мемлекеттік жәрдемақылармен, сондай-ақ Мемлекеттік әлеуметтік сақтандыру қорынан (бұдан әрі – МӘСҚ) баланы босануға және бала 1,5 жасқа толғанға дейін оның күтіміне байланысты жалпы сомасы 112,2 млрд теңгені құрайтын төлемдермен 597,4 мың адам қамтылды.
Ал бала туғанда берілетін жәрдемақыны 2026 жылдың басынан бастап республикалық бюджеттен барлығы 10,1 млрд теңге сомаға 50,9 мың адам қамтылды, оның ішінде ақпан айында 4,5 млрд теңге сомасына 22,4 мың адам алды. Бұл жәрдемақыға бала туған, асырап алған, сондай-ақ қамқорлыққа алған балалары бар еліміздің азаматтары, қандастар, сондай-ақ Қазақстанда тұрақты тұратын шетелдіктер үміткер бола алады.
Балаға күтім жасайтын адам міндетті әлеуметтік сақтандыру жүйесіне қатысушы болып табылмаған жағдайда туған, асырап алған, сондай-ақ қорғаншылыққа алған балалары бар, егер олар басқа ата-ананың отбасында ескерілмесе, өгей балалары бар адамдардың (отбасылардың) бала күтіміне байланысты жәрдемақы алуға құқығы бар. Есепті кезеңде 1,5 жасқа толғанға дейін бала күтімі бойынша жәрдемақымен 8,3 млрд теңге сомасында орта есеппен 129,8 мың адам қамтылды, оның ішінде ақпан айында 4,2 млрд теңге сомасына 129,5 мың адам алды.
Бала тууына және бала күтіміне арналған мемлекеттік жәрдемақылардың мөлшері республикалық бюджет туралы заңмен тиісті қаржы жылына бекітілген айлық есептік көрсеткішке (бұдан әрі – АЕК) байланысты белгіленеді. 2026 жылдың басынан бастап мемлекеттік жәрдемақылардың мөлшері 10%-ға индекстелген.
Бала тууына арналған жәрдемақы мөлшері:
— бірінші, екінші, үшінші балаға – 38,0 АЕК немесе 164 350 теңге;
— төртінші және одан кейінгі балаларға – 63,0 АЕК немесе 272 475 теңге.
Бала 1,5 жасқа толғанға дейін оның күтіміне байланысты төленетін жәрдемақы ай сайын келесідей мөлшерде төленеді:
— бірінші балаға – 5,76 АЕК немесе 24 912 теңге;
— екінші балаға – 6,81 АЕК немесе 29 454 теңге;
— үшінші балаға – 7,85 АЕК немесе 33 952 теңге;
— төртінші және одан кейінгі балаларға – 8,90 АЕК немесе 38 493 теңге.
Бұдан басқа жұмыс істейтін азаматтарға жүктілікке және босануға, жаңа туған баланы (балаларды) асырап алуға байланысты кірісінен айырылған жағдайда МӘСҚ-дан төленетін әлеуметтік төлем жүктілігі және босануы бойынша берілген демалыстың барлық күндеріне тағайындалады. Төлем мөлшері жүктілігі және босануы бойынша уақытша еңбекке жарамсыздық парағы берілгенге дейінгі соңғы 12 ай ішінде МӘСҚ-ға әлеуметтік аударымдар жүргізілген орташа айлық кіріске және еңбекке жарамсыздық күндерінің санына байланысты болады.
Аталған біржолғы төлемді жыл басынан бері жалпы сомасы 29,7 млрд теңгеге 30,8 мың адам алды, оның ішінде ақпан айында 12,9 млрд теңге сомасына 13,8 мың адам алды. Есепті кезеңде тағайындалған төлемнің орташа мөлшері 1 158 107 теңгені құрады.
Сондай-ақ МӘСҚ-дан бала бір жарым жасқа толғанға дейін оның күтіміне байланысты кірісінен айырылу жағдайы бойынша ай сайынғы әлеуметтік төлем міндетті әлеуметтік сақтандыру жүйесіне қатысушыға баланың туған күнінен бастап тағайындалады. Төлемнің мөлшері соңғы 2 жылда МӘСҚ-ға әлеуметтік аударымдар жүргізілген орташа айлық кірістің 40%-н құрайды. Екі және одан да көп бала туған жағдайда төлем әр балаға жеке тағайындалады.
2026 жылдың 2 айында бұл төлем 385,9 мың адамға тағайындалды, жалпы төлемнің сомасы 64,1 млрд теңгені құрады. Оның ішінде төлем ақпан айында 14 мың алушыға тағайындалды, төлемнің сомасы ақпан айында 2,4 млрд. теңгені құрады. Есепті кезеңде төлемнің ай сайынғы орташа мөлшері – 78 394 теңге.
Сообщение 2026 жылы қазақстандықтарға 112 млрд теңгеден астам сомада бала тууына және бала күтіміне байланысты жәрдемақылар төленді появились сначала на ZhambylNews АҚПАРАТ АГЕНТТІГІ - Жамбыл облысы жаңалықтары.