რადიო თავისუფლების ჟურნალისტმა ბავშვი გადაარჩინა კიევის ოლქში, რუსული დრონით განადგურებულ ბინაში
რადიო თავისუფლების უკრაინული სამსახურის ცნობით, ჟურნალისტის მიერ გადარჩენილი ბავშვი მამამ და უფროსმა ძმამ წაიყვანეს და ამჟამად უსაფრთხოდაა.
გასულ ღამით, უკრაინაზე რუსეთის ჯარების მორიგი შეტევისას კიევის ოლქის ბელოგოროდის რაიონში დრონი ერთ-ერთ სახლს მოხვდა. ამ სახლში ცხოვრობს მარიან კუშნირიც.
ჟურნალისტის ნაამბობით, დრონი სახლის სახურავს შეეჯახა და აფეთქებამ ზედა სართულზე მდებარე ბინაში ხანძარი გამოიწვია. მარიან კუშნირმა აფეთქების კონკრეტული ადგილის ძებნა დაიწყო და ბინაში იპოვა პატარა გოგო, რომელიც ტიროდა და დედას ეძახდა.
ჟურნალისტმა ბავშვი ბინიდან გამოიყვანა. ბავშვის დედა და მამაკაცი დრონის დარტყმის შედეგად დაიღუპნენ.
„როცა გოგონა გამოვიყვანე, ძალიან ატირდა, შემდეგ ძლიერი კანკალი დაეწყო და მომეხვია. და მაშინ ძალიან მეტკინა, რადგან ომის ათი წლის განმავლობაში არასდროს განმიცდია გრძნობა, როცა ხელში გიჭირავს ოთხი წლის ბავშვი, ის ტირის, შენ კი აცნობიერებ, რომ დედამისი მკვდარია“, - თქვა მარიან კუშნირმა.
კიევის ოლქის სამხედრო ადმინისტრაციის ხელმძღვანელმა მიკოლა კალაშნიკმა სოციალური ქსელებით 28 იანვარს, გამთენიისას გავრცელა ცნობა, რომ ბელოგოროდის რაიონში რუსული დრონებით დარტყმამ ხანძარი გამოიწვია მრავალბინიან სახლში, სადაც ორი ადამიანი დაიღუპა.
გასული ღამის განმავლობაში რუსეთის ჯარებმა კიევის ოლქის გარდა დაარტყეს ოდესის ოლქს, ქალაქებს, კრივოი-როგსა და ზაპოროჟიეს და სხვა რაიონებს. ადგილობრივი ხელისუფლების ინფორმაციით, დაშავდა ათამდე ადამიანი, დაზიანდა სახლები, სხვა შენობები და საპორტო ინფრასტრუქტურა.