ნიკა გვარამია: მიშა კვდება და ერი დუმს, ნობელიანტს კვალიფიკაციას უწუნებენ და ერი ისევ დუმს – გამაოგნებელი ამბები

საოცარი სურათია: მიშა კვდება და ერი დუმს, ნობელიანტს კვალიფიკაციას უწუნებენ და ერი ისევ დუმს – გამაოგნებელი ამბები, – ამის შესახებ „მთავარი არხის“ გენერალური დირექტორის, ნიკა გვარამიას ციხიდან გავრცელებულ განცხადებაშია ნათქვამი.

გვარამია ქვეყანაში მიმდინარე მოვლენების შესახებ წერს და აღნიშნავს, რომ საზოგადოება ყველა მათგანს დუმილით ხვდება.

„ციხეში ყოფნის უპირატესობები. დიტომ (საძაგლიშვილმა) მომინახულა და „ფეისბუქის“ ამონარიდები შემომიტანა.

საოცარი სურათია: მიშა კვდება და ერი დუმს, ნობელიანტს კვალიფიკაციას უწუნებენ და ერი ისევ დუმს, „მთავარი არხი“ რეგიონებში „იმედს“ უგებს, ამ დროს „მთავარი“ სულს ღაფავს, „იმედი“ ფულში იხრჩობა, ერი აქაც დუმს. ევროპული ფონდები კრიტიკულ არხებს ფულს არ აძლევენ (მერე უკვირთ, რუსეთთან საინფორმაციო ომში 10:0 რომ მარცხდებიან), სოსო (გოგაშვილი) ციხიდან უსტარს უსტარზე აგზავნის, ივანიშვილს ამხელს და თავის 15 მილიონიან ქონებას იცავს. სოსო (თოფურიძე) ისევ „ყველა ციხეში“-ს გაკივის და ოპოზიციას ამხელს.

გამაოგნებელი ამბები. გამაოგნებელი დუმილი. გამაოგნებელი სიბეცე. რა კარგია ციხეში ყოფნა,“ – წეს ნიკა გვარამია.