გამოკითხვის თანახმად, რუსეთში მეტი მოქალაქე აფასებს სიტყვის თავისუფლებას

რუსეთში მოქმედი დამოუკიდებელი კვლევითი ორგანიზაცია, „ლევადა ცენტრი“ ამბობს, რომ ქვეყანაში მნიშვნელოვნად გაზრდილია იმ მოქალაქეთა რიცხვი, რომლებიც აფასებენ სიტყვის, რწმენის და შეკრების თავისუფლებებს. 


20 ნოემბერს გამოქვეყნებულ გამოკვლევაში ორგანიზაცია ამბობს, რომ ბოლო ორი წლის განმავლობაში 34-დან 58 პროცენტამდე გაიზარდა რუსეთის იმ მოქალაქეთა რაოდენობა, რომლებიც ამბობენ, რომ სიტყვის თავისუფლება ადამიანის ერთ-ერთი უმნიშვნელოვანესი უფლებაა. 


დედაქალაქ მოსკოვში ამ ჯგუფის რაოდენობა გაორმაგდა, უფრო მომცრო ქალაქებში კი 1,5-ჯერ გაიზარდა, - ამბობს ორგანიზაცია. 



საერთო ჯამში, რუსეთის იმ მოქალაქეთა რიცხვი, რომლებიც სამართლიანი სასამართლოს უფლებას ერთ-ერთ უმნიშვნელოვანესად მიიჩნევენ, 50-დან 64 პროცენტამდე გაიზარდა, რწმენის თავისუფლების დამფასებელთა რაოდენობა კი 22-დან 40 პროცენტამდე ავიდა 2017 წლის შემდეგ. 


გამოკითხვა, რომლის ფარგლებშიც რესპონდენტებს სთხოვდნენ დაესახელებინათ ადამიანის ყველაზე მნიშვნელოვანი უფლებები, ოქტომბრის ბოლოს ჩატარდა რუსეთის 50 რეგიონში.