მამუკა ბახტაძემ რუსული ოკუპაციის შედეგებზე გაეროს შტაბ-ბინაში ისაუბრა
ნიუ-იორკში გაიმართა საქართველოს პრემიერ-მინისტრის და გაეროს გენერალური მდივნის შეხვედრა. მამუკა ბახტაძემ და ანტონიუ გუტერეშმა ისაუბრეს კონფლიქტების მშვიდობიანად მოგვარების პროცესში გაეროს როლზე, საქართველოს ოკუპირებულ ტერიტორიებზე არსებულ ვითარებასა და მთავრობის სამშვიდობო ინიციატივაზე. საქართველოს პრემიერ-მინისტრის პრესსამსახურის ინფორმაციით, ყურადღება გამახვილდა ოკუპირებულ ტერიტორიებზე შექმნილ რთულ ჰუმანიტარულ მდგომარეობაზე, საერთაშორისო სამშვიდობო მექანიზმების გააქტიურების მნიშვნელობასა და ჟენევის საერთაშორისო დისკუსიებისა და ინციდენტების პრევენციისა და მათზე რეაგირების მექანიზმის ეფექტურად გამოყენების აუცილებლობაზე. მამუკა ბახტაძემ ანტონიუ გუტერეშს გააცნო საქართველოს მთავრობის სამშვიდობო ინიციატივა “ნაბიჯი უკეთესი მომავლისკენ,“ რომელიც მიზნად ისახავს ნდობის აღდგენას კონფლიქტის შედეგად დაშორებულ საზოგადოებებს შორის. პრემიერ-მინისტრის განცხადებით, საქართველოს მთავრობა კონფლიქტის მშვიდობიანად მოგვარების ერთგულია და დიდ მნიშვნელობას ანიჭებს ამ პროცესში საერთაშორისო პარტნიორების მტკიცე მხარდაჭერას. მამუკა ბახტაძემ საქართველოში მიიწვია ანტონიუ გუტერეში, რომელმაც თავის მხრივ, აღნიშნა, რომ საქართველო გაეროს მეგობარია და მზად არის თბილისს პირველივე შესაძლებლობისთანავე ეწვიოს.
პრემიერ-მინისტრმა, მამუკა ბახტაძემ საქართველოს ოკუპირებულ რეგიონებში შექმნილ ვითარებასა და მთავრობის სამშვიდობო ინიციატივაზე ისუბრა ნიუ-იორკში, გაეროს გენერალური ასამბლეის 73-ე სესიის ფარგლებში გამართულ, ნელსონ მანდელას სახელობის მშვიდობის სამიტზეც. „რუსეთის ფედერაციასთან მიმდინარე კონფლიქტი გამოწვევად უდგას მშვიდობას ჩემს ქვეყანაში - საქართველოში. ის 1990-იანი წლების დასაწყისიდან იღებს სათავეს და ასობით ათას ადამიანს შეეხება. მათ საკუთარი სახლების დატოვება მოუწიათ და კვლავ ვერ ახერხებენ დაბრუნებას, ან ოკუპირებულ ტერიტორიებზე რჩებიან და დანარჩენ სამყაროს არიან მოწყვეტილნი, ეთნიკურ დისკრიმინაციას განიცდიან და ადამიანის უფლებების უხეში დარღვევების მსხვერპლნი არიან. 21-ე საუკუნეში კვლავ ვართ მავთულხლართების აღმართვის მომსწრენი, რომლებიცოჯახებს შუაზე ყოფს და ადამიანებს საკუთარ საცხოვრისს წყვეტს" - განაცხადა პრემიერ-მინისტრმა ბახტაძემ. მან აღნიშნა, რომ არსებული გამოწვევების მიუხედავად, საქართველო აგრესიას პასუხობს კონსტრუქციული ჩართულობით და მშვიდობიანი გადაწყვეტისკენ მიმართული მოლაპარაკებებით. პრემიერ-მინისტრმა ხაზი გაუსვა სამართლის პრინციპებზე დამყარებული წყობის, ადამიანის უფლებების პატივისცემისა და თავისუფლების ფუნდამენტური უფლებების აღსადგენად ერთობლივი ძალისხმევის აუცილებლობას.