Խնդիրների դեպքում «Իմ քայլի» տարբեր հատվածներ իշխանությունն իրենց կողմ տանելու փոխարեն պետք է իշխանությունից զրկվելու հարցն իրենց մեջ քննարկեն, իսկ դա կբերի ԱԺ արտահերթ ընտրությունների. Արա Հակոբյան
Երբ ինչ-որ խնդիրներ առաջանան, «Իմ քայլի» տարբեր հատվածներ ոչ թե պետք է փորձեն իշխանությունը դեպի իրենց կողմ տանել, այլ պետք է իշխանությունից զրկվելու հարցն իրենց մեջ քննարկեն, իսկ դա պետք է բերի արտահերթ խորհրդարանական ընտրությունների: Այս մասին Tert.am-ի հետ զրույցում ասաց «Ազգային օրակարգ» կուսակցության խորհրդի նախագահ Արա Հակոբյանը` նշելով, որ դա է լուծումը, որովհետև այն վարկանիշը, որը վարչապետն ուներ խորհրդարանական ընտրություններին, այլևս ունի:
Անդրադառնալով Արցախի հիմնախնդրի շուրջ բանակցություններին՝ Արա Հակոբյանն ասաց, որ կողմերի միջև պայմանավորվածությունները պետք է լինեն թափանցիկ, հանրությունը պետք է իմանա, թե ինչ է եղել օրակարգում, ինչ են խոսում, որովհետև մինչ օրս իշխանություններից լուր չկա, թե ինչի մասին են բանակցում:
Իշխանության օրակարգում գտնվող սահմանադրական փոփոխությունների վերաբերյալ Արա Հակոբյանն ասաց, որ իշխանությունը սահմանադրական փոփոխություններն ուզում է իրականացնել, որպեսզի դատաիրավական համակարգը համապատասխանեցվի նոր իրողություններին, ինչի մասին և վարչապետը հայտարարել է։
«Վարչապետը հետաքրքիր դիտարկում էլ արեց, որ իրեն խորհուրդ են տվել կիսանախագահական կարգի անցնել և ասաց, որ դրա անհրաժեշտությունը չի տեսնում, խորհրդարանական կարգի փոփոխության անհրաժեշտություն չկա, բայց եթե այդ փոփոխությունը լինի, ապա պետք է լինի անցում ուղիղ նախագահական կարգի»,– ասաց նա:
Արա Հակոբյանի խոսքով՝ տպավորություն է ստեղծվում, որ հերթական անգամ վարչապետը թեստավորում է իր ասածի արձագանքը: «Բայց մեր կուսակցությունը կարծում է, որ եղած համակարգը պետք է պահպանվի, եղած խորհրդարանական կարգում պետք է հակակշիռների և զսպումների համակարգը ձևավորվի, իսկ դա նշանակում է, որ սուպերվարչապետությունից մենք պետք է անցնենք ավելի հավասարակշռված կառավարման կարգի, այսինքն՝ խորհրդարանի և նախագահի լիազորությունները պետք է ավելացվեն ի հաշիվ սուպերվարչապետության և դա կլինի այն կառավարման կարգը, որը Հայաստանը պետք է ունենա»,– ավելացրեց նա:
Անդրադառնալով ներքաղաքական զարգացումներին և երեկ ոստիկանության քրեական գլխավոր վարչության կողմից հասարակական-քաղաքական միավորումների անդամներին բերման ենթարկելու միջադեպին՝ Արա Հակոբյանն ասաց, դա ուղղված է վախի մթնոլորտը խտացնելուն, որը չի ստացվելու.«Մարդիկ չեն վախենում: Այսօրվա իշխող ուժի ներկայացուցիչներից զգացվում է, որ դրա պատասխանատվությունը հիմա էլ ուզում են դնել ոստիկանության վրա, ուզում են քաղաքական պատասխանատվությունից դուրս գալ, և անցնել վարչարարության պատասխանատվության, որի պատասխանատուն պետք է լինի ոստիկանությունը: Ոստիկաններ, հասկացեք, թե ինչ է կատարվում, և կատարեք ապօրինի հրամաններն ու հրահանգները»:
Անդրադառնալով վարչապետի կողմից գրիչի լուսանկարը հրապարակելու պատմությանը, Արա Հակոբյանն ասաց, որ դա զավեշտ է.«Ի՞նչ ապացույց, դա զավեշտ է, սոցիալական ցանցերում դա դարձավ նաև ծաղրի առարկա: Սակայն Սահմանադրական դատարանի շուրջ ծավալվող իրադարձությունները լուրջ են, խոսքը ՍԴ նախագահը չէ, խոսքը սահմանադրական դատարանն է, այդ ինստիտուտը պետք է լինի անկախ»:
Հարցին, թե ԱԱԾ նախկին տնօրեն Արթուր Վանեցյանը հայտնել է վերջերս, որ ազգային անվտանգությանը վերաբերող այն սպառնալիքները, որոնց մասին ինքը խոսել է, վերաբերում են նաև ՍԴ-ի շուրջ ստեղծված և շարունակվող իրադարձություններին, Հրայր Թովմասյանն էլ հայտնեց, որ Արթուր Վանեցյանը պետք է ավելին խոսի, Արա Հակոբյանն ասաց, որ այո, ժամանակն է, որ Արթուր Վանեցյանը խոսի ՍԴ-ի մասով:
Հարցին, թե հնարավո՞ր է, որ ազգայնական թևը, կամ, այսպես ասած, իշխանական ընդդիմադիրները ՍԴ-ի շուրջ ծավալվող իրադարձությունների, գրիչի նման ապացույցների և այլ հարցերից ելնելով պառակտվեն, Արա Հակոբյանն ասաց.
«Այսօր Հայաստանում «Իմ քայլի» իշխանությունն է, և երբ ինչ-որ խնդիրներ առաջանան, «Իմ քայլի» տարբեր հատվածներ ոչ թե պետք է փորձեն իշխանությունը դեպի իրենց կողմ տանել, այլ պետք է իշխանությունից զրկվելու հարցն իրենց մեջ քննարկեն, իսկ դա պետք է բերի արտահերթ խորհրդարանական ընտրությունների, սա է այսօր լուծումը, որովհետև այն վարկանիշը, որը վարչապետն ուներ խորհրդարանական ընտրություններին, այլևս չկա և արդեն հանրության մեջ այլ համամասնություն կա և դրա համար խիստ կարևոր է արտախորհրդարանական ուժերի համախմբումը»:
Առավել մանրամասն՝ տեսանյութում: