Վենետիկում Ջակոմո Կազանովային նվիրված թանգարան կբացվի
Ապրիլի 2-ին իտալական Վենետիկ քաղաքում կբացվի 18-րդ դարի հայտնի ավանտյուրիստ, ճանապարհորդ, գրող, դիվանագետ, փիլիսոփա ու անթիվ-անհամար սիրային կապերով հայտնի Ջակոմո Կազանովային նվիրված թանգարանը:
Ինչպես նշում է italia-ru.com կայքը, թեև Կազանովայի մահից 220 տարի է անցել, սակայն նրա անունը չի մոռացվել, իսկ նրա կյանքի ուշագրավ դրվագները շարունակում են շարժել ժամանակակից մարդկանց հետաքրքրությունը:
Իր ժամանակի մեծագույն դեմքերի՝ Վոլտերի, Մադամ դը Պոմպադուրի ու Մոցարտի հետ կապերով պարծեցող Կազանովան ծնունդով Վենետիկից էր: Այդ պատճառով էլ թանգարանի համար ընտրվել է հենց այս քաղաքը:
Ոչ ավանդական թանգարանը գտնվում է Palazzo Pesaro Papafava-ում ու առանձնանում է ցուցանմուշների առատությամբ, ինչպես նաև գերառաջադեմ մուլտիմեդիական ցուցահանդեսով: Ի դեպ, նորարարական լուծումները հնարավորություն կտան վերարտադրելու հմուտ սիրեկանի կերպարն ու նրան իրականությանը հնարավորինս մոտ ներկայացնել:
Թանգարանի 6 թեմատիկ սենյակները նկարագրում են ինտելեկտուալ զբաղմունքներով ու կանանցով անչափ տարված Կազանովայի կյանքն ու հետաքրքրությունները:
Թանգարանի նպատակն է ժամանակակից մարդկանց համար «դուռ բացել» դեպի 18-րդ դարն ու Կազանովայի՝ արկածներով լի աշխարհը: