Наталля Сацункевіч: 8 сакавіка – гэта добрая нагода, каб нагадаць пра жанчын-палітзняволеных
Далучацца да грашовай падтрымкі палітзняволеных беларусак запрашаюць праз адмысловы збор. „Беларускі разам з усімі змагаліся за нашыя з вамі правы і многія з іх цяпер знаходзяцца за кратамі”, — гаворыцца ў зборы, які зарганізаваны да восьмага сакавіка. Бо гэты дзень — гэта свята не пра кветкі, а пра роўныя правы і магчымасці.
Збор стварылі тры арганізацыі, а з прадстаўніцай праваабарончага цэнтра „Вясна” Наталляй Сацункевіч паразмаўляла наша карэспандэнтка Ева Бардзілоўская.
РР: Чаму праваабарончы цэнтр „Вясна” далучыўся да гэтага збору?
– Праваабарончы цэнтр „Вясна” далучыўся да гэтага збору, бо мы лічым вельмі важным падтрымку жанчын, падтрымку палітзняволеных. 8 сакавіка добрая магчымасць прыцягнуць, як мага больш увагі і ўсё ж сабраць гэтыя грошы, каб мець магчымасць дапамагчы палітзняволеным.
РР: Што такое 8 сакавіка ў праваабарончым кантэксце?
– 8 сакавіка – гэта міжнародны дзень барацьбы жанчын за свае правы. „Вясна” сабрала інфармацыю пра палітычна матываваны пераслед жанчын. У нас якраз выйшаў артыкул на сайце і ў сацыяльных сетках. Мы палічылі колькі жанчын, як пераследаваліся, якія пакаранні, якія ўзросты, за якую тэматыку. Напрыклад, антываенны супраціў, удзел у мірных сходах і гэтак далей. Калі паглядзець, то бачым, што гэта ад студэнтаў да пенсіянерак, якія ў большасці выпадкаў проста рэалізоўвалі свае правы. Права на выказванне меркавання, свабоду мірных сходаў, людзі якія хацелі ўдзельнічаць у справядлівых выбарах, распаўсюд інфармацыі. Яны былі за гэта пакараныя, бо дзяржава не накіравана на тое, каб людзі вольна карысталіся правамі.
РР: Навошта адасабляць жанчын у асобную групу?
– Я паўтаруся, што 8 сакавіка – гэта проста добрая нагода, каб нагадаць пра тое, што існуюць жанчыны палітзняволеныя. Іх даволі шмат, больш за 150 чалавек.
Поўнасцю размову слухайце ў далучаным файле:
Збор пад назвай „Падары палітзняволенай тое, за што яна змагалася” можна знайсці і падтрымаць на сайце BYSOL.ORG. Грошы будуць збіраць да канца сакавіка.
Беларускае Радыё Рацыя
Artykuł Наталля Сацункевіч: 8 сакавіка – гэта добрая нагода, каб нагадаць пра жанчын-палітзняволеных pochodzi z serwisu БЕЛАРУСКАЕ РАДЫЁ РАЦЫЯ.