Святлана Ціханоўская: Мы павінны працягваць справу Кастуся Каліноўскага
Святлана Ціханоўская прыняла ўдзел у святочных мерапрыемствах, прысвечаных 160-годдзю паўстання 1863 года ў Варшаве.
Напярэдадні ж палітычная дзяячка далучылася да падзеі з той жа нагоды ў Вільні. “Нам вельмі прыемна, што блізкія суседзі – Польшча і Літва – нас падтрымліваюць”, – зазначыла Святлана Ціханоўская.
-Я вельмі ўдзячная Польшчы за тое, што запрасілі ўсю каманду Аб’яднанага Пераходнага Кабінета на гэтае мерапрыемства. Нам вельмі важна бачыць, што наш герой – Кастусь Каліноўскі – шануецца ў іншых краінах. І тое, што мы ўшанавалі яго гонар у Літве і Польшчы – гэта знак таго, што мы разам, што мы працягваем змагацца за тое, што нам належыць, за незалежнасць нашай краіны. І як у 1863 годзе Каліноўскі заклікаў змагацца за незалежнасць, зараз мы павінны працягваць яго справу. На жаль, нашыя краіны зараз ізноў пад ціскам, пад агрэсіяй Расейскай імперыі. І мы павінны адстойваць тое, што належыць нам.
Такія часы надышлі, што зноў нам даводзіцца змагацца з гэтым злом. Бо мы разумеем, што пакуль будзе пагроза іншай улады ў нашых краінах, то мы павінны змагацца за сваю нацыю, за беларускасць. Бо нашую нацыю хочуць знішчыць таксама, як і ўкраінскую. І мы павінны адстойваць зноў тое, што некалі пачаў Каліноўскі. Мы вельмі ўдзячныя нашым саюзнікам – Польшчы і Літве – за тое, што яны так сур’ёзна адстойваюць беларускую праўду. За тое, што сталі на бок дэмакратычных прадстаўнікоў Беларусі і за вольную Украіну. Нашыя народы даказваюць адныя адным, што мы – сябры. І ніякія пагрозы ці Расейская імперыя не парушаць гэтых сувезяў паміж нацыямі.
“Я думаю, у кожнай беларускай сям’і ёсць свой Каліноўскі – той, хто дае вам сілы на барацьбу і не дае спыніцца, нават калі здаецца, што ўжо няма надзеі”, – зазначыла Святлана Ціханоўская.
Беларускае Радыё Рацыя
Artykuł Святлана Ціханоўская: Мы павінны працягваць справу Кастуся Каліноўскага pochodzi z serwisu БЕЛАРУСКАЕ РАДЫЁ РАЦЫЯ.