Qarabağ`ın Qarabağdakı günləri
Hal-hazırda Azərbaycanın Neftçi ilə bərabər ən çox çempion olan, Avroliqada və Çempionlar Liqasında ölkəmizi layiqincə təmsil edən Qarabağ Futbol Klubu dünya futbolunda bənzərinə çox az rast gəlinən keşməkeşli bir tarixə sahibdir.
1960-cı ildə yaradılan klub ilk öncə “Məhsul” adlandırılıb. Azərbaycan SSR`nin daxili çempionatında doqquz mövsüm çıxış edən Ağdam klubunun ən yaxşı nəticəsi 1968-ci ildə qazanılan ikincilik olub.
68-ci ildən sonra isə yetərincə diqqət görməyən klubun dağılması Ağdam şəhərini növbəti doqquz il ərzində futbolsuz qoydu.
Fəaliyyəti 1977-ci ildə bərpa edilən klub 1982-ci ilədək “Şəfəq” 82-87-ci illər arası isə “Kooperator” adı altında ölkə çempionatında iştirak etdi.
1988-ci ildən Qarabağ adlanan klub elə həmin ildəcə ölkə birinciliyində çempion olaraq SSRİ çempionatının 2-ci dəstəsində mübarizə aparmaq hüququ qazandı.
1991-ci ildə imperiyanın süqutundan sonra “Atlılar” müstəqil Azərbaycanın ilk çempionatında çıxış etdilər. Xatırladaq ki, Neftçi ilə bərabər Ağdam klubu bütün ölkə çempionatlarında çıxış etmiş iki klubdan biridir.
Qarabağda başlayan müharibə kluba da öz təsirini göstərdi. Təsadüfi deyil ki, həmin dövr Ağdam klubunun baş məşqçisi olan milli qəhrəmanımız Allahverdi Bağırov 1992-ci ildə Qarabağ uğrunda gedən döyüşlərdə şəhid oldu.
1992-93-cü il mövsümü isə ağdamlıların öz doğma meydanında ev oyunlarını keçirtdiyi son mövsüm oldu. Həmin mövsüm qazanılan çempionluq isə “qara bayram”a çevrildi. Maraqlıdır ki, Ağdamın “İmarət” stadionunda keçirilən son oyun mayın 12-ndə ölkə kubokunun 2/1 finalı çərçivəsində məhz hal-hazırda Tovuzu təmsil edən Turan`a qarşı olub.
Şəhərin işğalından sonra isə (23 iyul 1993-cü il) Ağdamı tərk edən Qarabağ bu günə qədər də öz fəaliyyətini “qaçqın klub” kimi davam etdirir.
ONBİR kollektivi olaraq ən tez müddətdə “Köhlən Atlılar”ı yenidən öz doğma şəhərlərinə qayıtmasına ümid edirik.
Bu yolda itirdiyimiz şəhidlərin ailələrinə səbr diləyir, əsgərlərimizin isə təmkinli və cəsur olmağını arzulayırıq.