Алматы барахолкасындағы жанжал: 300-ден аса кәсіпкер контейнерден шығудан бас тартты
Таңертең белгісіз тұлғалар қақпаны құлыптап тастаған. Кәсіпкерлер тіпті киім-кешек пен аяқ киімдерін де шығарып үлгермеген. Қазір базар аумағына кіру мүмкін емес. Қоршауда базар жұмысының тоқтатылғаны және демонтаж жүріп жатқаны туралы хабарландыру баннері ілулі тұр.
Кәсіпкерлердің айтуынша, бұл базар ыңғайлы орналасуы мен жалдау ақысының арзандығына байланысты барлық саудагерлер үшін тиімді орын. Бизнесмендер бұл базарда 25 жылдан бері еңбек етіп келеді. Мұнда әйелдер, ерлер және балалар киімі мен аяқ киімдері сатылады. Әркім өз жұмыс орнын сақтап қалғысы келеді.
Кәсіпкерлердің сөзіне қарағанда, бұл орында сауда орталығын салу жоспарланған. Ал сатушыларға көрші базардағы шатырларға көшу ұсынылып отыр. Бірақ саудагерлер өз контейнерлерін тастап кетуден бас тартып отыр.
"Барлығының ипотекасы, бала-шағасы бар, күн көру үшін бірдеңе істеу керек. Шатырда қалай тұрмақпыз? Бұл дегеніңіз 90-жылдар ғой! Шатырда қалай сауда жасауға болады? Мұндай ұсынысты қабылдау мүмкін емес. Жалпы біз бұған қарсымыз. Бәріміз қарсымыз, солай емес пе?", - деді кәсіпкер Наргиз Мамедова.
"Шатырда қалай отырамыз? Үстел қойып қоямыз ба? Менің куртка толы контейнерім бар. Шатырға қалай сыймақпын? Бұл тіпті күлкілі жағдай", — деді Лариса Титова.
Әкімдіктегілер сатушылардың мұнда заңсыз сауда жасап жатқанын алға тартады. Шенеуніктердің мәлімдеуінше, жалдау мерзімі осыдан сегіз жыл бұрын аяқталған. Жер телімі абаттандыру үшін мемлекет меншігіне өткен.
"Іс жүзінде бұл учаскеде рұқсат құжаттарынсыз, антисанитарлық жағдайда, өрт қауіпсіздігі талаптарын бұза отырып заңсыз базар жұмысын жалғастырып келеді. Оның бір бөлігі қойма ретінде пайдаланылса, бір бөлігі жабық тұр. 2023 жылы жер телімі абаттандыру үшін аудан әкімі аппаратына берілгеннен кейін, аумақты босату туралы жеке талап арыз берілді. Құқықтық аяда жұмыс істеуге дайын жандарға көрші базарлардан жеңілдік шарттарымен баламалы сауда орындары ұсынылады", - деп хабарлады Алматы әкімдігінің баспасөз қызметі.
Қазір шенеуніктер кәсіпкерлерге көрші базарлардан сауда орындарын ұсынып жатыр. Бірақ бизнесмендер контейнерлерін тастап кетуге келіспейді. Олар өзге базарларда жалдау ақысы тым жоғары екенін айтуда. Кәсіпкерлер қазірдің өзінде сотқа жүгінді.