“Кез келген адам анасына бүйрегін берер еді“ - ұлы анасына донор болғаны туралы

46 жастағы Юлия Соснова ауыр дертке шалдығып, оған бүйрегін алмастыру керек болған. Оған кіші ұлы донор болды, - деп хабарлайды TengriHealth.
Мән-жайы
Әйелдің айтуынша, оның денсаулы 2023 жылы сыр бере бастаған.

"Қан қысымым 200-ден 210-ға дейін көтеріліп, бұл бүйректің жұмысына кері әсерін тигізді. Дәрігер: не трансплантация, не гемодиализ деген шешімді айтты", - деп еске алады ол.

Анықтама: Бүйрек қанды дұрыс тазарта алмаған кезде гемодиализ олардың қызметін ауыстырады.
Юлия бұл жағдайды отбасымен талқылап, жұбайы мен үлкен ұлы бірден диализге қарсы болған. Олар трансплантация жасау үшін талдама тапсырған.
Трансплантация кезіндегі сәйкестік коэффициенті - бұл, негізінен, донорлық органның реципиент ағзасына қаншалықты сәйкес келетінін және иммундық жүйенің оған қалай әрекет ететінін көрсететін көрсеткіш. Ол қан тобы, тіндік сәйкестік және антиденелердің болуы бойынша бағаланады.
Бұл көрсеткіш өте маңызды, себебі ағзаның жаңа органды қабылдауы соған байланысты. Сәйкестік жоғары болса, асқыну қаупі төмендейді. Сәйкестік төмен болған жағдайда - асқыну ықтималдығы артады, сондықтан күрделі дайындық пен күшті терапия қажет болады.
"Ата-ана баласына беруі керек, керісінше емес"
Нәтижесінде туыстарының ішінен кіші ұлы Артём ғана донор бола алған.

"Мен, әрине, келіспедім, қалай болғанда да ол балам ғой. Негізі ата-ана баласына беруі керек, керісінше емес. Бірақ жақындарым мені көндірді. Қатты қорықсам да, ақыры келісімімді бердім. Әлі талдама тапсырмай жатып-ақ, ұлым донор болатынын айтқан еді", - деп еске алады Юлия.

Артемның айтуынша, ол қорықпай, басынан-ақ отаның сәтті өтетініне сенімді болған.

"Менің орнымда кез келген адам анасына бүйрегін берер еді. Біз отаны өте ұзақ күттік - дайындық кезеңі қажытып жіберді. Мен анама үнемі қолдау көрсетіп, бәрі жақсы болатынын білдім. Тек күту керек болды. Қазір бәрі артта қалды, жағдайымыз жақсы", - деді ол.

Денсаулық сақтау министрлігінің баспасөз қызметі қан тобы сәйкес келмеген жағдайда жасалатын трансплантация ұзақ әрі күрделі дайындықты қажет ететінін түсіндірді.

"Бұл әдіс донор мен реципиенттің қан тобы сәйкес келмесе де, трансплантация жасауға мүмкіндік береді. Отбасы бұл қиын жолдан бірге өтті", - деп хабарлады министрлік.

Артем отадан кейін бесінші күні, ал Юлия Соснова оныншы күні ауруханадан шығарылды. Қазір олардың денсаулығы жақсы, қалыпты өмір сүріп жатыр.