Лионел Месси 900-голга энг тез етиш бўйича янги рекорд яратди
Футбол оламида яна бир тарихий воқеа қайд этилди. Лионел Месси ўз фаолияти давомида урган голлари сонини 900 тага етказиб, янги рекорд ўрнатди. Аргентиналик суперюлдуз учун ушбу юбилей гол CONCACAF Чемпионлар кубоги доирасидаги «Нэшвилл»га қарши баҳсда (1:1) киритилди.
Эътиборли жиҳати шундаки, Месси ушбу натижага етиш учун атиги 1142 та ўйин ўтказди ва бу жаҳон футболи тарихида энг тез кўрсаткич сифатида қайд этилди. Солиштириш учун, унинг асосий рақобатчиларидан бири — Криштиану Роналду бу маррага 1236-учрашувда етиб келган.
Ёш масаласида ҳам Месси устунлик қилди: у 900-голини 38 ёш 268 кунлигида нишонлаган бўлса, Роналду бу натижага 39 ёш 213 кунлигида эришган. Бу эса аргентиналик футболчининг самарадорлиги ва барқарорлигини яна бир бор тасдиқлайди.
Маълумот учун, Месси 2023 йилдан буён «Интер Майами» сафида тўп тепмоқда. Унгача у Европа футболида «Барселона» ва ПСЖ жамоалари шарафини ҳимоя қилган ва 8 карра «Олтин тўп» соҳиби сифатида тарихга кирган.
Месси ҳозир ҳам юқори даражада ўйин кўрсатаётгани, унинг карьераси ҳали тугамаганини кўрсатмоқда. Қисқаси, GOAT деб бекорга айтишмайди.