Ғалымдар тәуліктегі ең өнімді уақытты атады
Көп адам әлі ұйқыда жатқанда, кейбіреулер күнін ерте бастайды. Таңертең сергек болып, алдағы жоспарға ден қою үшін уақыт қажет. Ғалымдардың айтуынша, таңды ертерек қарсы алудың пайдасы бар: шамамен сағат 10:30-ға қарай адам өзін барынша сергек әрі белсенді сезінеді, - деп хабарлайды Tengri Life DoctorPiter-ге сілтеме жасап.
Бірнеше жыл бұрын Лондон университеттік колледжі ауқымды зерттеу жүргізіп, оның нәтижелері British Medical Journal Mental Health журналында жарияланған. Зерттеу деректеріне сүйенсек, ерте тұратын адамдардың өмірге қанағаттану деңгейі мен психикалық саулығы жоғары болады. Ал кешкі уақытқа қарай көпшіліктің көңіл күйі төмендеп, шаршау мен жабырқау сезімі күшейеді.
"Бұл адамдардың психикалық денсаулығы мен әл-ауқаты күннің уақытына байланысты өзгеруі мүмкін екенін көрсетеді. Орташа есеппен біз таңертең өзімізді жақсы сезінеміз, ал кешке қарай нашарлай береді", - дейді жетекші автор доктор Фейфей Бу.
Сондай-ақ, London Offices мамандары жұмыс тапсырмаларын орындауға ең қолайлы уақытты анықтаған. Олардың мәліметінше, еңбек өнімділігінің шарықтау шегі шамамен сағат 10:30-ға сәйкес келеді. Бұл уақытта адам оянып, сергіп үлгереді, бірақ әлі шаршамайды. Көңіл күйі тұрақты болғандықтан, жұмыс та нәтижелі жүреді.
Ал түскі астан кейін жұмыс істеуге деген құлшыныс төмендейді. Ағза ас қорытып жатқанда зейін әлсіреп, ми "жеңіл ақпаратқа" ауысады. Адам әлеуметтік желіге кіріп кетуі немесе әріптестерімен әңгімеге алаңдауы мүмкін. Орташа есеппен еңбекке қабілеттіліктің төмендеуі сағат 14:55 шамасында байқалады.
Дегенмен күннің екінші жартысы толықтай тиімсіз деп айтуға болмайды. Зерттеушілердің айтуынша, шамамен 16:16 кезінде мотивация мен зейіннің тағы бір қысқа мерзімді артуы тіркеледі. Әрине, әр адамның биологиялық ырғағы әртүрлі. Кейбіреулер таңертең барынша өнімді болса, енді бірі кешке қарай белсендірек болады.
Мамандар зейінді сақтаудың басты кілті үзілістерді дұрыс ұйымдастыру екенін айтады. Күні бойы 5 минуттық қысқа үзілістер миға серпін береді. Бұл қысқа серуен, бір шыны кофе ішу немесе жеңіл жаттығу болуы мүмкін. Ең бастысы негізгі жұмыстан аз уақытқа ғана алаңдау.
Сонымен қатар, жайлы жұмыс ортасын қалыптастыру және басымдықтарды нақты белгілеу маңызды. Күндік жоспар құрып, негізгі істерге назар аудару тиімділікті арттырады. Ал телефон мен компьютердегі хабарландыруларды сөндіру сияқты алаңдататын факторларды азайту жұмысқа ден қоюға көмектеседі.