Точилин фикрича, МОК қарори FIFA ва UEFAGA ҳам таъсир қилади
Футбол эксперти Александр Точилин «Евро-Футбол.Ru» нашрига берган интервьюсида FIFA президенти Жанни Инфантино Россия жамоаларига қўйилган тақиқни бекор қилиш кераклиги ҳақидаги баёноти ҳамда ОАВда тарқалган МОК Россия спортига нисбатан санкцияларни яқин орада олиб ташлаши мумкинлиги бўйича хабарларга муносабат билдирди. Бу ҳақда euro-football.ru хабар беради.
Точилиннинг айтишича, МОКнинг Миландаги йиғилишида Россия спортига қўйилган барча чекловларни тез орада бекор қилиш бўйича принципиал қарор қабул қилингани ҳақидаги гаплар анчадан бери айланиб юрибди. У бу хабарлар рўёбга чиқишига умид билдирди ва Россиясиз йирик мусобақаларда интрига ҳам, оммабоплик ҳам пасайишини Европа томонлари ҳам тушунишини таъкидлади.
Инфантинoнинг Россияни четлатиш «маънoсиз» экани ҳақидаги фикрларига тўхталган Точилин, ҳозирги вазият дунёда икки томонлама стандартлар ва Россияга нисбатан бирёқлама ёндашув борлигини кўрсатаётганини қайд этди. Унинг фикрича, вақт ўтиши билан ўзлари ҳам бундай бан мантиқсиз экани аён бўлаётганини кўрмоқда.
Эксперт МОК санкцияларни олиб ташласа, бу футболга ҳам бевосита таъсир қилиши мумкинлигини айтди. Точилин бунинг ортидан «занжирли реакция» юзага келиб, бошқа ташкилотлар ҳам аввалги қарорларини қайта кўриб чиқишини, айниқса МОК каби йирик тузилма буни биринчи бўлиб қилса, қолганлар учун прецедент яратилишини таъкидлади.
Инфантино келажакда сиёсий сабаблар билан жамоаларни мусобақалардан четлатишни қонунан тақиқлаш кераклигини ҳам айтганди. Точилин бу ғояни қўллаб-қувватлаб, спортнинг асосий шиори сиёсатдан холи бўлиши кераклиги, Россияга нисбатан қабул қилинган қарорлар эса айнан шу тамойилга зид эканини билдирди.
ОАВда FIFA апрел ойидаги конгрессда Россиянинг халқаро турнирларга тўлиқ қайтиши масаласини муҳокама қилиши мумкинлиги ҳам ёзилмоқда. Точилин бундай муддатларда қайтиш эҳтимолини инкор этмади ва бундай маълумотлар асоссиз пайдо бўлмайди, дея ижобий сценарий ҳақида ўйлаш мумкинлигини айтди.
У Россияга рухсат берилгандан кейин ҳам айрим рақиблар майдонга тушишдан бош тортиши эҳтимоли борлигини тан олди. Точилиннинг фикрича, ҳар бир ташкилотнинг регламенти бор ва кимдир уни бузса, сабабидан қатъи назар, белгиланган интизомий чоралар қўлланиши керак; техник мағлубиятлар берилиши бошқаларга ҳам бундай демаршлар фақат ўзларига зарар келтиришини англатадиган сигнал бўлади.