Чақалоққа қайноқ қаҳва сепган эркак иши кескинлашди
2024 йилда Австралиянинг Брисбен шаҳрида содир бўлган дахшатли ҳодиса яна кун тартибига чиқди. BBC хабарига кўра, тўққиз ойлик чақалоққа қайноқ қаҳва сепганликда гумонланаётган шахсни қидириш ва ишни тезлатиш мақсадида Хитой Австралияга махсус “ишчи гуруҳ” юборишини билдирди.
Маълумотларга кўра, чақалоқ оиласи билан боғда дам олаётган пайтда ҳужумга учраган. Оқибатда боланинг юзи, қўл-оёқлари оғир куйиш жароҳатларини олган. Гумонланувчи 33 ёшли эркак экани айтилади. Полиция унинг шахсини аниқлашга улгурган, бироқ у мамлакатни тарк этиб кетган.
Ҳозирда гумонланувчи Хитой ҳудудида экани қайд этилмоқда. Лекин Австралиянинг Хитой билан экстрадиция (топшириш) бўйича келишуви йўқ. Шунинг учун ҳам Хитойнинг Австралиядаги элчиси Сяо Цян 29 январь куни ишчи гуруҳ Брисбенга бориб, терговга кўмаклашишини маълум қилди.
“Биз бу масалага жиддий қараймиз ва зарур чораларни кўришга қатъиймиз”, деган Сяо Цян. Унинг таъкидлашича, гуруҳ Австралия расмийлари билан бирга ҳодиса қандай ва нима сабабдан рўй берганини ойдинлаштириш, кейинги ҳамкорлик қадамларини муҳокама қилиш билан шуғулланади.
Квинсленд полицияси ва Австралия Федерал полициясининг қўшма баёнотида эса Хитой ўз фуқароларини мамлакат ташқарисида содир этилган хатти-ҳаракатлар учун ҳам жиноий жавобгарликка тортиш юрисдикциясига эга экани қайд этилган.
Қидирувдаги шахсга нисбатан оғир тан жароҳати етказиш ниятида ҳаракат қилиш моддаси билан ҳибсга олиш ордери берилган. Австралияда бу айблов умрбод қамоқ жазосигача олиб бориши мумкин.
Полиция гумонланувчини “доимий яшаш жойига эга бўлмаган ишчи” сифатида тасвирлаган. У 2019–2024 йиллар оралиғида Австралияга бир неча бор келган, Виктория ва Янги Жанубий Уэлс штатларида ҳам бўлган.
Ҳодисанинг ўзи ва чақалоқнинг оғир куйиш жароҳатлари бутун Австралияда қаттиқ норозилик уйғотган. Тахминларга кўра, эркак оила пикник қилаётган пайтда термосдаги қайноқ қаҳвани болага сепган. Ҳужумдан кейин чақалоқ бир неча бор тери кўчириш операцияларига муҳтож бўлган.
Орадан уч ой ўтиб ота-онаси боланинг аҳволи ҳақида маълумот берган: ияк ва елка қисмида чандиқлар қолган, бироқ қолган жараёнлар “яхши кетаётгани” айтилган. Шунингдек, чақалоқни даволаш учун очилган онлайн хайрия орқали 230 минг доллардан зиёд маблағ йиғилган.