Ҳусанов ва Доннарумма: дербида «Сити»ни шармандаликдан қутқарганлар

Манчестер дербисида “шаҳарликлар”ни қабул қилган “Юнайтед” кутилмаганда рақибни жуда енгил йўл билан енгди. Мезбонлар “Сити” дарвозасига жавобсиз икки тўп киритди, яна учта гол эса ўйиндан ташқари ҳолат сабаб бекор қилинди. Қисқаси, таблода 2:0, майдонда эса “Сити” учун оғриқли сигналлар.

Учрашувдан кейин “шаҳарликлар” мухлислари ижтимоий тармоқларда жамоани қаттиқ танқид қилди. Аммо умумий норозилик фонида икки футболчига нисбатан муносабат деярли бир хил бўлди: дарвозабон Жанлуижи Доннарумма ва марказий ҳимоячи Абдуқодир Ҳусанов. Улар ҳақида “кечанинг ягона ёруғ нуқтаси” деган фикрлар кўпайди.

Айниқса, ўзбек футболчиси омадсиз кечган дербида ҳам энг яхшилардан бири бўлди. Унинг ўсиши фақат шу баҳсда эмас, балки бутун мавсум давомида яққол кўзга ташланяпти — майдондаги ҳаракат, позиция танлаш, ҳимоядаги совуққонлик ва тўп билан ишлашдаги ишонч бунга исбот.

Кадрлар билан боғлиқ муаммолар (Йошко Гвардиол, Жон Стоунз ва Рубен Диашнинг жароҳати) сабаб Пеп Гвардиола дербида марказий ҳимояда вақт синовидан ўтмаган тандем — 21 ёшли Ҳусанов ва 20 ёшли Макс Аллейнни туширди. Англиялик ҳимоячи ўйинни бутунлай чиқара олмади ва танаффусдаёқ алмаштирилди. Ҳусанов эса финал ҳуштагигача майдонда қолди ҳамда учрашувдан кейин “Манчестер Сити” таркибида энг ишончлилардан бири сифатида эътироф этилди.

Абдуқодир Ҳусановнинг ўйиндаги кўрсаткичлари қуйидагича:

- Паслар (аниқлиги): 76/81 та (94%)
- Тўпни олиб қўйиш: 2 та
- Тўпни узоқлаштириш: 9 та
- Тўпни бош билан узоқлаштириш: 3 та
- Тўпни йўлдан олиб қолиш: 3 та
- Тўпни қайтариб олиш: 3 та

Эътиборли жиҳати: бу кўрсаткичларнинг аксариятида Ҳусанов “Сити” таркибида энг яхши натижани қайд этди. У фақат тўпни кесиш ва хавфни бартараф этиш билан чекланмади — тўп билан ҳам жуда фаол ҳаракат қилди:

- 98 та тўпга тегиниш (фақат Родри ундан кўп),
- 81 та узатма (иккала жамоа ўйинчилари орасида 2-ўрин),
- 94% аниқлик — бу борада ҳам фақат Родри ундан олдинда бўлди.

Бундай рақамлар фонида Ҳусанов жамоанинг бошқа ҳимоячилари орасида яққол ажралиб турди ва Доннарумма билан бирга кечанинг энг ишончли футболчилари қаторига чиқди.

Учрашувдан кейин “Сити” мухлислари ижтимоий тармоқларда қуйидаги фикрларни ёзди:

Sadhorse:
Агар Доннарумма ва Ҳусанов бўлмаганида, ҳисоб 5:0 кўринишига келарди.

Drinkandrant:
Ҳусанов — бизнинг янги Серхио Рамосимиз. Унга алоҳида раҳмат.

ThiagollPo:
Ҳусанов ва Жижи бу ўйиндан қолган ягона яхши хотира. Аллейн ва Льюис трансферга қўйилиши керак, Холанд ва Фоден — захирага.

Hamxamcfc:
Фоденга ҳам, Родрига ҳам лаънат. Рико Льюис ҳам шу ерда қолсин. Семеньо, Аке, Доку, Бернарду — ҳаммаси кетсин. “Манчестер Сити”га шарманда.

Биз мухлислар Доннаруммани яхши кўрамиз ва албатта, сени ҳам Ҳусанов.

DjallenDs:
Энг минимал талаб — максимал ҳаракат қилиш. Биз эса яккама-якка курашларда ҳам ютмадик. Бугун “Манчестер Юнайтед” ғалаба қозонишни кўпроқ истади. Фақат дарвозабон ва Ҳусанов яхши кўринди, қолганлари — мутлақ шармандалик.

The_lawyerguy:
Бу ўйиндан кейинги ягона фикр: Ҳусанов захирада ўтириши керак эмас. У Марк Гехи билан яхши жуфтлик ҳосил қилишига умид қиламиз.

Шунга ўхшаш изоҳлар жуда кўп: мухлислар Ҳусановнинг таркибга тез-тез киришини истаяпти, чунки бошқа ўйинчиларнинг ўйини уларни қониқтираётгани йўқ. Ҳусанов эса сўнгги бир йилда катта ўсиш қилди ва бу фақат “қўллаб-қувватлаш” эмас, айнан майдондаги иши билан исботланяпти.

Энди энг қизиғи олдинда: агар Гвардиола ҳимояда янги “барқарор жуфтлик” қидираётган бўлса, Ҳусанов бундай шансни ўйини билан аллақачон сотиб олди. “Сити”га ҳозир айнан шундай характер ва совуққонлик керак.