Тен Хаг клуб эгаларини танқид қилди: “Футболни тушунмайди”

«Байер» ва «Манчестер Юнайтед» клубларининг собиқ бош мураббийи Эрик тен Хаг замонавий футболда клуб хўжайинлари (эгалари) таъсири тобора ортиб бораётганини танқидий руҳда баҳолади. Нидерландиялик мутахассиснинг фикрича, бу жараён кўп ҳолларда футбол манфаатига хизмат қилмаяпти — аксинча, қарорлар қимматга тушяпти.

Маълумот учун, тен Хаг 2025 йил 1 сентябр куни «Байер»даги лавозимидан бўшатилган эди. Ҳозирда эса у Нидерландиянинг «Твенте» клубида техник директор сифатида фаолият юритмоқда. Яъни у жараёнларни фақат мураббий сифатида эмас, клуб бошқаруви нуқтаи назаридан ҳам ичидан кўриб турибди.

Тен Хагнинг таъкидлашича, вазият йилдан-йилга оғирлашяпти: «Вазият тобора кескинлашиб бормоқда. Тобора кўпроқ клуб эгалари ўзларини кўрсатишни истайди. Одатда, улар футболни яхши тушунишмайди».

Унинг фикрига кўра, айрим эгалар саҳнада кўпроқ кўриниш, таъсирини намойиш қилиш ва “мен ҳам қарор қиламан” деган кайфият билан ҳаракат қилади. Лекин футбол — бу PR эмас, у ерда хато қарорнинг нархи жуда баланд: натижа кетади, жамоа руҳи синади, мухлис асабийлашади.

Шунингдек, тен Хаг техник директорлар ҳақида ҳам кескин фикр билдирди. Daily Mail онлайн-нашри келтирган иқтибосга кўра, у баъзан қарорлар спорт логикасига эмас, қулай шароит ва “ўзини оқлаш” механизмига қурилишини айтган:

«Техник директорлар, шунингдек, кўпинча натижалар қониқарсиз бўлганда, қулай шароитлар туфайли қарор қабул қилишади».

Оддий қилиб айтганда, натижа ёмонлашса, айбдор қидириш осон, аммо муаммонинг илдизига кириш — қийин. Тен Хаг эса айнан шу нуқтада “футболни бошқарувчилар ҳақиқий футболни тушунса” деган сигнални беряпти.

Бу гаплар ҳозирги футбол реалиятига жуда мос: пул кўпайган сари, таъсир учун кураш ҳам ортди. Аммо мухлис учун бир нарса муҳим — майдонда натижа ва ўйин сифати. Шунинг учун тен Хагнинг бу чиқиши кўпчиликка таниш фикрни яна бир бор овоз чиқариб айтди: футболни футболчилардек тушунадиганлар бошқарса, клуб ҳам нафас олади.