Exodus лойиҳаси BioWare ветеранлари қўлида қолмоқда
Mass Effect’нинг “маънавий вориси” сифатида тилга олинаётган Exodus атрофидаги мухлислар Archetype Entertainment раҳбари Жеймс Оллен студияни тарк этгани ҳақидаги хабардан сўнг хавотирга тушди. Бу ҳақда playground.ru хабар беради.
Бу хавотирлар кучайгач, Оллен жамоатчиликка мурожаат қилиб, лойиҳа “жуда ишончли қўлларда” эканини таъкидлади. Унинг айтишича, ишлаб чиқиш жараёнини тажрибали мутахассислар, жумладан BioWare’дан чиққан, Mass Effect устида ишлаган ветеранлар давом эттирмоқда.
Оллен кетиш қарорини ўтган ёздаёқ қабул қилганини ва бунга “касбий куйиш”нинг олдини олиш истаги сабаб бўлганини айтди. AAA даражадаги ўйинлар яратишда олти йилдан ортиқ вақт бизнес ва ижодий масъулиятни биргаликда кўтариб келган у энди “эстафетани топшириш вақти келди” дея изоҳ берди.
Шу билан бирга, у бу қарор Hasbro билан тўлиқ келишилган ҳолда амалга ошганини, жамоа билан муносабатлари яхши эканини ва брендга алоқадор лойиҳаларда креатив маслаҳатчи сифатида ҳамон иштирок этишини қайд этди.
Раҳбариятдаги ўзгаришларга қарамай, Exodus’нинг асосий пойдевори ўзгармагани айтилмоқда: сюжет ва ўйин олами устидан ҳануз Дрю Карпишин назорат олиб бормоқда. У Mass Effect’нинг дастлабки икки қисми ҳамда Star Wars: KOTOR билан танилган сценарийнавис ҳисобланади.
Оллен, шунингдек, лойиҳани у ўнлаб йиллардан бери ишониб келадиган профессионаллар бошқаришини, улар орасида студия ҳаммуассиси Жесси Скай ҳам борлигини таъкидлади.
Exodus премьераси 2027 йил бошига мўлжалланган. Лойиҳа яратиш жараёнида актёр Меттью Макконахи ҳам иштирок этаётгани аввалроқ маълум қилинган.