Қўшиқларини бошқалар куйлашини хоҳламайдиган Кумуш Раззоқова ҳақида

Хонанда Кумуш Раззоқова шахсий ҳаёти ҳақида ошкора гапиришни хуш кўрмайдиган санъаткорлардан бири саналади. Унинг исмини отаси Абдулла Қодирийнинг “Ўткан кунлар” романидаги Кумуш образига ҳавас қилиб қўйган. Санъаткор россиялик актёр ва мусиқачи Владимир Барамиков билан турмуш қурган. Улар йигирма йил бирга яшаганидан сўнг ажрашишган.

2013 йилда Кумуш Раззоқова оғир автоҳалокатга учраб, жиддий жароҳат олган. Оқибатда хонанда икки ой давомида юра олмай қолган.

У ижодий фаолиятини “Садо” гуруҳида бошлаган. Бироқ маълум сабабларга кўра гуруҳ тарқалиб кетган. Ҳозирда эса хонанда деярли ижод қилмайди. Интервюларида бунга сабаб сифатида энди саҳнада ёшларга навбат бериш кераклигини таъкидлаб келади.

Шунингдек, Кумуш Раззоқова ўз қўшиқларини бошқа санъаткорлар томонидан саҳнада ижро этилишига қарши эканини очиқ айтган.

“Мен ҳали тирикман. Қўшиқларимни бошқалар куйлашига рухсат бермайман”, — дейди у.

Хонанда фикрича, ҳар бир нарсанинг боши бўлгани каби охири ҳам бор:

“Кун келиб санъаткор саҳнани тарк этиб, ўзидан кейинги ёш авлодга жой бўшатиши керак. Қариганда ҳам рейтинг талашиб, тиш-тирноғи билан курашаётган хонандаларни тушунмайман. Санъатда нимага эришиш мумкин бўлса, эришилди, энди ёшларга йўл бериш керак”, — дейди у интервюларидан бирида.

Кумуш Раззоқова ўзининг энг катта камчилиги сифатида курашувчан эмаслигини ҳам тан олган.

“Бу камчилигимни ҳалигача енга олмаганман. Осон таслим бўламан”, — дея очиқ тан олади хонанда.

Кумуш Раззоқова ижро этган “Ёмғир”, “Мен сени ҳеч кимга бермайман”, “Оқ булут”, “Саратон”, “Икки дарахт” ва яна ўнлаб қўшиқлар эса ҳанузгача ўзбекистонлик тингловчилар қалбидан мустаҳкам ўрин эгаллаб келмоқда.