Тошкентда Uzbekistan Judo Tour: чемпионлар аниқланди, кескин баҳслар

2025 йил тақвимидаги сўнгги йирик дзюдо тадбирларидан бири — “Uzbekistan Judo Tour” мусобақасининг Тошкент шаҳридаги босқичи муваффақиятли якунланди. Пойтахтимизнинг “Олимпия” шаҳарчасида жойлашган яккакураш спорт турларига ихтисослаштирилган замонавий аренада ўтган беллашувлар дзюдо ихлосмандлари учун ҳақиқий байрамга айланди.

Мукофот жамғармаси 200 миллион сўмни ташкил этган мусобақада тўртта вазн тоифасида ўта муросасиз ва жанговор баҳслар бўлиб ўтди. Ҳар бир чиқишда ғалаба учун кураш, характер ва маҳорат намоён бўлди. Якунда -66 кг вазнда Анваржон Иброҳимов, -73 кг вазнда Низомиддинхўжа Тошпўлатов, +90 кг тоифасида Амир-Саид Джейлиев ҳамда аёллар ўртасида +70 кг вазнда Ирисхон Қурбонбоева чемпионлик шоҳсупасига кўтарилди.

Жамоавий ҳисобда эса Тошкент вилояти терма жамоаси барча рақибларини ортда қолдирди. Улар 1 тадан олтин, кумуш ва бронза медалларини қўлга киритиб, умумжамоа ҳисобида биринчи ўринни эгаллади. Бухоро вилояти дзюдочилари 1 та олтин ва 1 та кумуш медал билан иккинчи поғонага жойлашган бўлса, Хоразм вилояти вакиллари 1 тадан олтин ва бронза медаллари билан кучли учликни якунлади.

Мусобақадаги натижалар ҳудудларда дзюдо мактаблари изчил ривожланаётганини, ёш спортчилар орасида рақобат йилдан-йилга кучайиб бораётганини яққол кўрсатди. Айниқса, бир қатор финал жанглари сўнгги сонияларгача интрига сақлаб қолди ва мухлислар томонидан қизғин қўллаб-қувватланди.

-66 кг тоифасида Анваржон Иброҳимовнинг ишончли ҳаракатлари, -73 кг вазнда Низомиддинхўжа Тошпўлатовнинг техник устунлиги, оғир вазнда Амир-Саид Джейлиевнинг жисмоний тайёргарлиги ҳамда Ирисхон Қурбонбоеванинг қатъияти алоҳида эътиборга лойиқ бўлди.

-66 кг:
1. Анваржон Иброҳимов (Бухоро)
2. Мухриддин Тиловов (Қашқадарё)
3. Артём Штурбабин (Тошкент вилояти)
3. Муҳаммад Эргашев (Тошкент шаҳри)

+70 кг:
1. Ирисхон Қурбонбоева (Хоразм)
2. Зарина Бобоназарова (Тошкент шаҳри)
3. Фотима Куранбоева (Хоразм)
3. Севинч Маҳмуджонова (Сирдарё)

-73 кг:
1. Низомиддинхўжа Тошпўлатов (Сурхондарё)
2. Замаҳшарий Бекмуродов (Бухоро)
3. Иноят Телманов (Тошкент шаҳри)
3. Дилшодбек Баратов (Сурхондарё)

+90 кг:
1. Амир-Саид Джейлиев (Тошкент вилояти)
2. Муҳаммадали Тангриев (Тошкент вилояти)
3. Фазлиддин Рафиков (Тошкент шаҳри)
3. Жаъфар Наимов (Тошкент шаҳри)

Тадбирнинг юқори савияда ташкил этилгани, ҳакамлик сифати ва спортчилар учун яратилган шароитлар мусобақага нуфуз бағишлади. Бу ҳақда Ўзбекистон дзюдо федерацияси матбуот хизмати ҳам расман маълум қилди.

Қисқаси, Тошкент босқичи нафақат мавсумнинг чиройли якунларидан бири бўлди, балки келгуси йиллар учун янги номлар, янги умидлар ва катта мусобақалар сари мустаҳкам қадам бўлиб қолди.