Туркия футболида катта можаро: ҳакамлар ва президент қамалди
Истанбул Бош прокуратураси томонидан олиб борилаётган тергов ишлари Туркия футболида янги можарони очди. Букмекерлик фаолияти билан ноқонуний алоқада бўлганликда гумон қилинган 21 нафар шахсга нисбатан иш қўзғатилди. Улардан 18 нафари суд қарори билан ҳибсга олинди. Расмий маълумотларга кўра, қамалганлар орасида мамлакат Суперлигасида фаолият юритувчи бир клуб президенти ҳам бор.
Анадолу агентлиги тарқатган хабарга кўра, тергов жараёни бир неча ой давом этган ва натижада катта миқдордаги ноқонуний букмекерлик фаолияти фош қилинган. Терговчилар ушбу тўданинг айрим аъзолари орқали мусобақа натижаларини манипуляция қилиш эҳтимолини ҳам ўрганмоқда.
Бу воқеадан аввал Туркия футбол федерацияси кескин чора кўрган эди. Федерация интизом қўмитаси 149 нафар профессионал ҳакамни букмекерлик билан боғлиқ айбловлар туфайли 8 ойдан 1 йилгача бўлган муддатда мусобақалардан четлатганини эълон қилган.
Федерация раҳбари Иброҳим Ҳажжиосманоғлу бу ҳолатни “турк футболидаги ахлоқий инқироз” деб атади. Унинг сўзларига кўра, сўнгги ойларда ўтказилган ички текширувлар давомида 42 нафар ҳакамнинг 1000 дан ортиқ ўйинга пул тикиб келгани аниқланган. Улардан бири эса якка ўзи 18 000 мартадан зиёд ставка қилган.
“Бизга футболни поклаш керак. Бу фақат натижа эмас, балки ишонч, қадрият ва одоб масаласидир. Ҳар қандай бўлмасин, кимнинг кимлигидан қатъи назар, қонун олдида жавоб бериши шарт”, — деган Ҳажжиосманоғлу матбуот анжуманида.
Мутахассислар таъкидлашича, бу можаро фақат ҳакамлар ёки клублар даражасида эмас, балки бутун тизим ичидаги иллатлар юзасидан жиддий сигналдир. Айрим спорт таҳлилчилари бу иш Туркия футболи тарихидаги энг йирик букмекерлик жанжалларидан бири бўлиши мумкинлигини айтишмоқда.
Ҳозирда прокуратура айбланувчиларнинг молиявий операциялари ва телефон мулоқотларини таҳлил қилмоқда. Шу билан бирга, Туркия ички ишлар вазирлиги тергов доирасини кенгайтириб, айрим ҳакамлар ва агентлар фаолиятини ҳам текширишга қарор қилган.
Турк жамоатчилигида бу воқеа катта муҳокамаларга сабаб бўлди. Футбол мухлислари ижтимоий тармоқларда тизимни тозалашни ва шаффофликни таъминлашни талаб этмоқда. Бу ҳолат, кўпчилик фикрича, нафақат спорт майдонида, балки бутун футбол соҳасида ислоҳот заруратини яна бир бор кўрсатди.