Криштиану Роналду ўзини Девид Бекҳемга қиёслади

Криштиану Роналду Пирс Морганга берган очиқчасига интервьюсидан кейин яна муҳокамалар қаҳрамонига айланди. Суҳбат чоғида спортчи ўзини ташқи кўринишидан футбол афсонаси Девид Бекхемдан кўра жозибалироқ деб ҳисоблашини тан олди. Юлдузнинг сўзларига кўра, у "барча фазилатларга эга."

Ўзининг провокацион саволлари билан машҳур бўлган Пирс Морган Роналдудан ўзини Бекхемдан чиройлироқ деб ҳисоблайсизми, деб сўради. Футболчи аввалига мужмал жавоб берди, кейин эса қўшимча қилди: "Мен учун ташқи кўриниш нафақат юз, балки бутун қиёфа ҳамдир." Бошловчи Копакабана пляжи бўйлаб иккаласи ҳам сайр қилса, ким кўпроқ эътиборни тортишини аниқлаштирганида, Роналду ўйлаб ўтирмай: "Мен - юз фоиз," деб жавоб берди.

Португалиялик Бекхемни ҳурмат қилишини ва уни "чиройли эркак" деб ҳисоблашини таъкидлади, аммо қўшимча қилди: "Унинг юзи чиройли, ҳа. Лекин қолган ҳаммаси нормал ҳолат. Мен шунчаки нормал эмасман. Мен мукаммалман." Унинг изоҳи бошловчи ва студия томошабинларининг кулгисига сабаб бўлди. Кейинроқ спортчи ҳазиллашганини қўшимча қилган.

Интервью якунида Криштиану ўзини сайёрадаги энг таниқли инсонлардан бири деб ҳисоблашини айтди. "Келинг, бутун дунё учун дебат уюштирайлик - ким машҳурроқ, менми ёки Доналд Трамп? Менимча, мени энг кичик оролларда ҳам билишади, - деди у жилмайиб.

Бекҳем ва Роналду кўпинча нафақат спортчи сифатида, балки услуб тимсоллари сифатида ҳам таққосланади. Иккаласи ҳам "Манчестер Юнайтед" ва "Реал Мадрид"да ўйнаган ва кейинчалик ўзларининг кийим ва парфюмерия линияларини ишга туширган, реклама кампанияларида қатнашган ва мода журналларида суратга тушган.