Нидерландияда Россия учун жосуслик қилган 17 ёшлилар қўлга олинди
Нидерландия ҳудудида Россия манфаатлари йўлида жосуслик қилган икки нафар 17 ёшли ўсмир ҳибсга олинди. Бу ҳақда 26 сентябрь, жума куни De Telegraaf нашри хабар тарқатди. Маълумотларга кўра, ўсмирлар 16 август куни Ҳаага шаҳридаги Европол, Европа адлия тизими ҳамда Канада элчихонаси бинолари яқинидан ўтаётганда, уларда «Wi-Fi-сниффер» — яъни интернет тармоқларини кузатиш, паролларни ўғирлаш ва турли маълумотларни қўлга киритиш учун мўлжалланган махсус ускуна борлиги аниқланган.
Тергов жараёнида маълум бўлишича, йигитлар билан Telegram мессенжери орқали аноним куратор алоқа ўрнатган. Уларга қўйилган айбловлар Нидерландиянинг Разведка ва хавфсизлик хизмати (AIVD) томонидан тақдим этилган маълумотлар асосида илгари сурилган.
Бу мамлакат тарихида илк бор вояга етмаган шахсларнинг хорижий давлат томонидан ёлланиши билан боғлиқ ҳолат сифатида қайд этилмоқда. 25 сентябрь, пайшанба куни гумонланувчилар тергов судяси олдига олиб чиқилди. Суд қарорига кўра, улардан бири яна қўшимча 14 кун қамоқда қолдирилди. Иккинчисига эса уй қамоғи белгиланиб, электрон билагузук тақиш мажбурияти юклатилди.
De Telegraafнинг ёзишича, гумонланувчилардан бири ҳали мактаб ўқувчиси бўлиб, хоккей билан шуғулланган, геймингга қизиққан ва ҳатто уйқуга ҳам юмшоқ ўйинчоқ билан ётган. Унинг ота-онаси учун эса ушбу воқеа мутлақо кутилмаган ҳолат бўлиб чиқди. Йигит базм ва кечаларга бормаган, фақат супермаркетда ишлаб юргани маълум қилинган.
Қўлга олиш амалиёти чоғида камида саккиз нафар ҳуқуқ-тартибот ходими тинтув ордери билан уйга кириб борган ва ҳибс жараёнини амалга оширган. Бу воқеа нафақат ота-оналар, балки кенг жамоатчилик учун ҳам катта ҳайрат уйғотди.