Миңнеханов Әлмәттә яшь нефтьчеләр конкурсында катнашучыларны сәламләде

Татарстан Рәисе Рөстәм Миңнеханов Әлмәткә эш сәфәре кысаларында нефть тармагының яшь белгечләре арасында уздырыла торган һөнәри осталык конкурсында катнашучыларны сәламләде. Бу хакта ТР Рәисе матбугат хезмәте хәбәр итә.

Әлмәттә нефтьчеләр конкурсы беренче тапкыр 1970 елда уздырылган. 55 ел дәвамында ярышлар буыннар дәвамчанлыгын, югары хезмәт стандартларын һәм инновацияләр кертүне символлаштыручы традициягә әйләнде, дип ассызыклады Рөстәм Миңнеханов.

«Глобаль үзгәрешләр чорында һәм ясалма фәһемнең роле арта барган шартларда югары квалификация һәм профессиональлеккә ихтыяҗ аеруча зур. Стандарт булмаган юнәлештә фикер йөртергә һәм инновацияләр кертергә сәләтле белгечләргә ихтыяҗ арта, бигрәк тә икътисадның нефть-газ секторы кебек стратегик тармакларында», - дип билгеләде республика Рәисе.

Конкурста иң талантлы яшь хезмәткәрләр катнаша, дип өстәде Татарстан җитәкчесе. «Белемегезне һәм осталыгыгызны уңышлы күрсәтә, тәҗрибә алыша һәм карьера үсеше өчен яңа мөмкинлекләр ала алырсыз, дип ышанам. Безнең ил сезнең талантыгызга, тырышлыгыгызга һәм эшкә тугрылыгыгызга мохтаҗ. Сез – безнең илнең сәнәгатенең алтын фонды. Без сезнең белән горурланабыз!», - диде ул.

Быел конкурс финалына 437 катнашучы узган. Алар 30 төрле юнәлештә көч сынаша. Миңнеханов конкурс мәйданчыкларын карап чыкты һәм нефть һәм газ чыгару операторлары, җир асты скважиналарын ремонтлау бригадалары, бораулау бригадалары, электромонтерлар, автозаправка станцияләре хезмәткәрләре, медицина хезмәткәрләре һәм башка профильле белгечләр арасындагы ярышларны күзәтте.