Доллар курсы 542 теңгеден асты
11 тамыздағы доллардың орташа бағамы 542 теңгеден асты, - деп хабарлайды Tengrinews.kz тілшісі.
Қазақстан қор биржасындағы KASE-те күндік сауда қорытындысы бойынша доллардың салмақталған орташа бағамы 542,66 теңге болды, бұл 2,85 теңгеге жоғарылады. Ресми мәлімет бойынша, Ұлттық банктің 11 тамыздағы доллар курсы 539,49 теңгені құрайды.
kurs.kz деректері бойынша, қазір Алматыдағы айырбастау орындарында долларды сатып алу орташа бағамы 542,12 теңге, сатылымы — 544,20 теңге. Астанадағы айырбастау орындарында долларды орташа есеппен 540,52 теңгеге сатып алып, 547,52 теңгеге сатады.
31 шілдеде премьер-министрдің бірінші орынбасары Роман Скляр Қазақстандағы доллар курсы бойынша болжамымен бөлісті.
"Менің және әріптестерімнің болжамы бойынша доллар курсы қайтадан төмендейді. Ол мұншалықты жоғары болмайды. Бұл жағдайды біз түрлі жағдайларда бірнеше рет көрдік, курс тұрақталды. Менің ойымша, Ұлттық банк бұл үшін барлық мүмкіндіктерді жасайды, ал нарық өз жұмысын қажетті түрде орындайды", — деді ол үкіметтегі брифингте.
30 шілдеде Қазақстандағы айырбастау орындарында доллар бағамы 550 теңгеден асты. Кейін Ұлттық банк валюталық интервенцияларды бастағанын хабарлады. 1 тамызда реттеуші "теңгені құтқару" үшін сол күні 125,6 миллион доллар жұмсағанын айтты.
Естеріңізге сала кетейік, бұған дейін премьер-министр Олжас Бектенов теңге курсы мен девальвация күтулері туралы журналистердің сұрағына жауап берген еді. Оның айтуынша, курс тек нарықтық принциптер бойынша қалыптасады және қазіргі уақытта ұлттық валюта бағамының кенет өзгеруіне әкелетін факторлар жоқ.
"Курс нарықтық факторлар негізінде қалыптасады, Ұлттық банктің араласуы жоқ. Біздің бағалауымыз бойынша және көптеген ірі сарапшылардың пікірінше, теңгенің кенет әлсіреуіне негіз жоқ", – деп атап өтті үкімет басшысы.
Сілтемесіз жаңалық оқисыз ба? Онда Telegram желісінде парақшамызға тіркеліңіз!