Аббосбек Файзуллаев “Истанбул Башакшеҳир”да қанча маош олади?
Европа футбол бозорида эътибор марказига айланган мавзулардан бири – Аббосбек Файзуллаевнинг Туркия чемпионатидаги янги саҳифаси ҳақидаги янгиликлар бўлиб турибди. Оммавий ахборот воситалари ва турк инсайдерларининг маълумотларига кўра, ЦСКАдан “Истанбул Башакшеҳир” жамоасига амалга оширилаётган бу трансфер кўплаб мухлислар ва экспертлар орасида қизғин муҳокамаларга сабаб бўлмоқда.
Янги шартнома шартларига тўхталар эканмиз, “Башакшеҳир” ўзбек легионери учун “армиячилар”га 7,5 миллион евро бадал пули тўлашга рози бўлди. Шу билан бирга, бонуслар сифатида яна 2,5 миллион евро миқдорида қўшимча маблағ ажратилиши келишилган. Файзуллаев эса тиббий кўрикдан муваффақиятли ўтиб, расман янги жамоаси билан шартнома имзолади. Энди у йиллик маош сифатида 1 миллион евро оладиган бўлди. Кўрсаткичлар ва натижаларга қараб, қўшимча бонуслар ҳам назарда тутилган.
Қайд этиш керакки, Аббосбек Файзуллаев ЦСКА сафида ўйнаган даврда йиллик 100 минг евро атрофида маош олган ва Россия чемпионатидаги энг кам тўланадиган футболчилардан бири бўлган. Янги шартномадаги молиявий имкониятлар унинг салоҳияти ва меҳнатига муносиб равишда белгилангани мухлислар учун қувонарли янгилик бўлди.
Шу ўринда, таниқли мутахассислар ва собиқ футболчилар ҳам ўз фикрларини билдиришмоқда. Александр Мостовой фикрича, Аббоснинг Туркияда фаолият бошлаши унинг ўсиши учун муҳим қадам бўлади. Европа тажрибаси ва жисмоний куч-қувват тўплаш Файзуллаев учун янги босқич яратади.
- "Аббос учун “Башакшеҳир”га ўтаётгани жуда яхши. У Европа тажрибасини олиши муҳим. Айнан шу нарса бизнинг футболчиларга етишмайди. У ЦСКАдаги фаолиятини ёрқин бошлади, лекин кейинчалик нималардир рўй берди.
Файзуллаев маҳоратли йигит. Россияда етмаган нарсаларга, Туркияда эга бўлади. Мен жисмоний куч-қувватни назарда тутяпман. Европада бунга жуда катта эътибор қаратишади.
ЦСКАга эса Файзуллаев етишмайдиган бўлди. Чунки у жуда ақлли футболчи эди", - дейди Мостовой.
ЦСКА собиқ футболчиси Кирилл Набабкин эса, бу трансфер клуб учун катта йўқотиш эканини таъкидлади ва Аббоснинг салоҳияти юқорилигини эътироф этди.
- "Файзуллаевнинг ўрнини тўлдириш мумкин, лекин мен буни катта йўқотиш, деб ҳисоблайман. Аббос “армиячилар” жамоасида иккита яхши мавсумни ўтказди. Ўтган чемпионатда ўйинида бироз пасайиш бўлди, асосий таркибда камроқ майдонга тушди. Лекин Файзуллаев ёш ва салоҳияти катта ўйинчи, майдонда натижа қила олади. Унинг кетгани ЦСКА учун катта йўқотиш", - дейди Набабкин.
Файзуллаевнинг Россиядаги натижаларига назар ташласак, у икки мавсум давомида ЦСКАда 72 та ўйинда майдонга тушиб, 8 та гол ва 22 та ассистга муаллифлик қилди. Ёш футболчи бу даврда жамоаси билан бирга Россия чемпионати бронза медали, мамлакат кубоги ва Суперкубогини қўлга киритган.
Аббосбек Файзуллаевнинг Туркиядаги янги ҳаёти ва профессионал йўли мухлислар учун катта қизиқиш уйғотмоқда. Янги мавсумдаги илк ўйинлари ва натижалари нафақат ўзбек футболининг, балки халқаро футбол майдонининг ҳам марказида бўлади. Олдинда уни янада катта имкониятлар ва янги ютуқлар кутмоқда!