Бүгін Металлургтер күні атап өтіледі
Бүгін Қазақстанда металлургия саласы қызметкерлерінің кәсіби мерекесі атап өтіледі, - деп хабарлайды Tengrinews.kz тілшісі.
Металлург күні Қазақстан Президентінің 2003 жылғы Жарлығымен бекітілген. Бұл мереке жыл сайын шілденің үшінші жексенбісінде атап өтіледі. Ол - елдің өнеркәсіп секторы үшін ең маңызды мерекелердің бірі.
Қара металлургия - ауыр өнеркәсіптің негізгі салаларының бірі. Экономикасы дамыған мемлекеттерде металлургияға айрықша мән беріледі. Себебі шойын мен болат өндірісінсіз ғылыми-техникалық прогресті дамыту мүмкін емес. Дәл осы металлургия - құрылыс, машина жасау, кеме жасау, ұшақ құрастыру және басқа да маңызды өндірістік және экономикалық салалар үшін шикізат пен жұмыс материалы.
Сондай-ақ, Қазақстанның түсті металлургиясы - елдің ең көне және жетекші өнеркәсіп саласы. Оның дамуы еліміздің аса бай пайдалы қазбалар қорына негізделген және Қазақстанның бүкіл өндірістік кешенінің қалыптасуына зор ықпал етеді.
Қазақстан түсті металлургиясының басты артықшылығы - өзінің минералдық-шикізат базасының болуы. Ел аумағында түсті металл кендерінің мол қоры бар. Түсті металдарға мыс, мырыш, қалайы, қорғасын, мишьяк, сүрме және сынап кен орындары жатады.
Сонымен қатар, бағалы металдарды (күміс, алтын және басқа да сирек кездесетін металдар – осмий, палладий, иридий, родий) өндіру және оларды қайта өңдеу - Қазақстанның алтын-валюта қорын толықтыратын негізгі көздердің бірі. Әлемде ең жоғары бағаланатын осы қымбат металл өндірісіне ел барынша күш жұмсап отыр.
Сілтемесіз жаңалық оқисыз ба? Онда Telegram желісінде парақшамызға тіркеліңіз!