Европа Иттифоқи сунъий интеллектни тартибга солишни кечиктирмоқчи эмас

Брюссел – Европа Иттифоқи ўзининг тарихий аҳамиятга эга бўлган сунъий интеллект қонунларини белгиланган ҳуқуқий муддатларга мувофиқ амалга оширишда қатъий туришини маълум қилди. Бу баёнот, сўнгги кунларда Google эгаси Алпҳабет, Facebook эгаси Мета, Европанинг Мистрал ва АСМЛ каби компаниялари томонидан қонунларнинг кучга киришини кечиктиришга қаратилган мурожаатларга жавобан янгради.

Европа Комиссияси матбуот котиби Томас Рене 4-июл куни бўлиб ўтган матбуот анжуманида қуйидагича изоҳ берди:

"Мен АИ Аcт бўйича кўплаб хабарлар, мурожаатлар ва баёнотларни кузатдим. Жуда аниқ айтмоқчиман: соатни тўхтатиш йўқ. Имтиёзли муддат йўқ. Қонунни кечиктириш йўқ."

Европа Иттифоқининг АИ қонуни 2025-йил феврал ойида кучга кирди. Шу йилнинг август ойида умумий мақсадли сунъий интеллект моделлари учун мажбуриятлар кучга киради. Юқори хавфли деб таснифланган СИ тизимларига оид талаблар эса 2026-йил августдан эътиборан мажбурий бўлади.

Комиссия йил охиригача рақамли қоидаларнинг маъмурий юкламаларини, хусусан, кичик компаниялар учун соддалаштиришга қаратилган таклифлар билан чиқишни режалаштирмоқда. Бу, айниқса, янги қоидаларга мослашиш учун молиявий ва техник ресурслари чекланган кичик ва ўрта бизнес вакиллари учун муҳим енгиллик бўлади.

Айни пайтда, баъзи йирик технологик компаниялар ушбу қонунларнинг бажарилиши катта харажатларга олиб келишини ва инновацияларнинг сустлашишига сабаб бўлиши мумкинлигини таъкидламоқда. Европа эса бу ташвишларга қарамай, сунъий интеллект соҳасида ишончли ва хавфсиз муҳит яратишга интилмоқда.

Европа Иттифоқининг АИ Аcт қонуни дунёда илк бор сунъий интеллектни тўлиқ ҳуқуқий асосда тартибга солишга қаратилган бўлиб, у глобал технология етакчилари – АҚШ ва Хитой – фонида Европа технологик мустақиллигини мустаҳкамлашга хизмат қилади.