Дунёдаги энг тор автомобиль: италиялик механикнинг ғаройиб ихтироси...

Ретро автомобилиларнинг ноодатий модификацияларга асос қилиб олиниши сўнгги йилларда автомобил мухлислари ўртасида алоҳида қизиқиш уйғотмоқда. Аммо бу сафарги янгилик классик Fiat Panda’нинг тамомила бошқача талқини билан боғлиқ, деб хабар берди dzen.ru/hi-tech.mail.ru. Италиялик механик Андреа Марацси бутун дунёдаги энг тор автомобиль яратишга қарор қилди ва бу лойиҳа ҳақиқий сенсацияга айланди.

1993 йилда ишлаб чиқарилган Fiat Panda асосида яратилган бу мутлақо янгича транспорт воситаси атиги 50 сантиметр эни билан нафақат хетчбек, балки мультфильм қаҳрамонларини эсга солади. Бу митти автомобиль бир ўриндиқли бўлиб, ташқи кўриниши ва қисқалиги билан барчани ҳайратга солади.

Марацсининг таъкидлашича, лойиҳа устида ишлаш бир йилдан ортиқ давом этган. Шу вақт мобайнида механик асл 1993 йилги моделнинг деярли барча қисмларини, жумладан фаралар, эшиклар, том қисми ва ғилдиракларни сақлаб қолган. Бироқ энг катта ўзгариш кузовда намоён бўлган: уни иккига бўлиб, махсус усулда торайтирилган ва ягона ўриндиқ учун жой яратилган.

Техник жиҳатдан, ушбу мини-карнинг кўп функциялари сақланган — у ҳаракатлана олади, тўхтайди, бурилиш чироқлари ва фаралар ишлайди. Аммо кузов остида стандарт Fiat двигатели учун жой қолмагани сабаб, Андреа Марацси ижодий ёндашувга қўл урган ва автомобилга электр самокат двигатели ҳамда 24 волтли аккумулятор ўрнатган. Шу туфайли, транспорт воситаси 15 км/соат тезликда 25 километр масофани босиб ўта олади.

Муҳими, бу мини-автомобиль расмий рўйхатдан ўтмаган ва шаҳар кўчаларида ҳаракатланиш учун мўлжалланмаган — у асосан автокўргазмалар ва технофорумларда намойиш этиладиган намуна сифатида яратилган.

Автомобиль мухлислари ва экспертлар бу ғаройиб лойиҳани ижодий ёндашув ва классик моделларнинг замонавий талқини сифатида баҳоламоқда. Шу билан бирга, бу лойиҳа яна бир бор инсоннинг фантазияси ва техникага бўлган иштиёқини намоён қилди.

Яқин кунларда мазкур ноодатий автомобиль ҳақидаги фотосуратлар ва видеолар ижтимоий тармоқларда катта муҳокамаларга сабаб бўлиши шубҳасиз. Шунингдек, бу каби ихтиролар анъанавий автомобиль саноатига янгилик ва ижодий руҳ олиб келмоқда — механика ва фантазия чегара билмайди!