Шомуродов А Серияда қолиши мумкин — янги музокаралар бошланди
Маълумки, Элдор сўнгги мавсумни Довбикнинг ўринбосари сифатида самарали ўтказди ва энди катта эҳтимол билан “Рома” билан хайрлашиш арафасида турибди. Гарчи унга чет эл жамоаларидан ҳам турли таклифлар тушаётган бўлса-да, ўзини Италия чемпионати муҳитида анча қулай ҳис қилган футболчи А Серияда қолишни маъқул кўрмоқда.
Шомуродов аввалроқ “Женоа” ва “Кальяри” каби клубларда ҳам тўп тепган ва маҳаллий футбол муҳитини яхши ўрганган. Ҳозирда А Серияга қайтган “Кремонезе” жамоаси тажрибали ҳужумчи қидирмоқда ва Элдор улар учун идеал вариант сифатида кўрилмоқда.
Футболчининг жисмоний ҳолати, универсал ўйин услуби ва Италия футболидаги кўп йиллик тажрибаси “Кремонезе” учун муҳим омил бўлмоқда. Шу боис, клуб мураббийлар штаби Шомуродовнинг трансфери устида жиддий иш олиб бормоқда.
Маълумотларга қараганда, “Рома” ҳужумчини тахминан 8 миллион еврога баҳоламоқда. Музокаралар яқин кунларда фаоллашиши кутилмоқда. Қолаверса, Элдорнинг ўзи ҳам янги жамоага ўтишга очиқ экани ушбу келишувни амалга ошишига имкон яратиши мумкин.
Шундай қилиб, юртдошимизнинг Италиядаги фаолияти янгича босқичга ўтаётган кўринади. Келаси кунлар ушбу жараёнда ҳал қилувчи аҳамият касб этиши тайин. Футболчилар бозори қизғин паллага кириб борди ва Шомуродовнинг трансфери ҳам шулар қаторида эътибор марказида бўлиб турибди.