Ғазода ҳалокатли портлаш: Исроил армияси оғир йўқотишга учради
Исроил армиясининг 605-жанговар муҳандислик батальони аъзолари қатнашган мазкур воқеа жуда оғир оқибатларга сабаб бўлди. Маълумотларга кўра, жангчилар жойлашган Puma оғир зирҳли муҳандислик техникаси остига портловчи мослама ўрнатилган ва у фаоллашганидан сўнг техникада бўлган барча аскарлар тириклайин ёниб кетган. Ёнғинни ўчириш бўйича барча уринишлар самара бермаган. Кейинчалик куйган жасадлар Ғазодан олиб чиқилди.
Исроил расмийлари ҳалок бўлган аскарлар рўйхатини эълон қилди: улардан бири лейтенант, қолган олтитаси сержантлар эканлиги маълум бўлди. Вафот этганларнинг барчаси 605-жанговар муҳандислик батальони сафида хизмат қилган.
Хон Юнус шаҳри яқинида рўй берган яна бир воқеада эса шу батальоннинг икки аскари гранатомёт зарбаси оқибатида жароҳат олган. Уларнинг бири оғир, иккинчиси енгил тан жароҳати билан шифохонага етказилди. Бу билан Исроил армиясининг Ғазода қуролли ҳужумлар бошланганидан буён йўқотишлари сони 440 нафарга етди.
Мазкур фожиага Исроил мудофаа вазири Исроил Кац ўзининг Х (собиқ Twitter) саҳифаси орқали муносабат билдирди. У: “Аскарларимиз қаҳрамонларча жанг қилди ва Исроилни ҳимоя қилиш ҳамда гаровга олинган фуқароларимизни озод этиш миссиясида ҳалок бўлишди”, дея вафот этганларнинг оилаларига ҳамдардлик изҳор этди.
Исроил президенти Исаак Герцог ҳам юртдошларининг оғир йўқотишидан чуқур қайғуда эканлигини таъкидлади: “Ғазода вазият ниҳоятда оғир. Жанглар ва йўқотишлар ҳамон давом этмоқда. Азадор оилаларни қучоқлаймиз, яраланганлар тез шифо топсин, ҳарбийларимизга сабр ва матонат тилаймиз”.
Шунингдек, 7 октябрь воқеаларидан сўнг бошланган можаро бутун минтақада занжир реакциясини келтириб чиқарди. Уруш натижасида ҳалок бўлган ғазоликлар сони 56 мингдан ошган, қурбонларнинг кўпчилиги аёллар ва болалардан иборат. Исроилнинг ҳужумлари Ливан, Сурия ва Эрон ҳудудларига ҳам ёйилиб, бу мамлакатларда ҳам тинч аҳоли қурбон бўлмоқда.
Zamin.uz таҳририяти:
Ғазо ва унга туташ минтақада вазият тобора мураккаблашиб бораётган бир пайтда, ҳар бир инсон ҳаёти бебаҳодир. Сўнгги воқеалар — уруш оқибатларининг қандай оғир бўлишини яна бир бор эслатиб турибди.