Барколя учун катта кураш: “Арсенал”, “Челси” ва “Бавария”дан жиддий ҳаракат
Маълумотларга қараганда, мазкур клублар Барколянинг ўйин услуби ва статистикасидан келиб чиқиб, уни ўз сафларида кўришни жуда истамоқда. Франциядаги нуфузли L’Equipe нашрининг ёзишича, мазкур уч жамоа ПСЖга “жозибали таклифлар”ни тақдим этган.
Барколя кетишни истамаяпти
Шу билан бирга, футболчининг ўзи Парижда қолишни афзал кўрмоқда. Унинг фикрича, ПСЖда у ўзини янада ривожлантириши ва янги ютуқларга эришиши мумкин. Айни пайтда жамоа бош мураббийи Луис Энрике ҳам Барколянинг кетишига мутлақо қарши. У бу футболчини клубнинг муҳим қуроли сифатида кўрмоқда.
Энрикенинг режаси — Барколяга асосий ўрин
Энрике ёш иқтидорларни ривожлантиришга катта эътибор қаратадиган мутахассис сифатида танилган. Барколя эса унинг схемасида қанотдаги асосий фигуралардан бирига айланган. Мураббий франциялик футболчининг тезлиги, дриблинги ва пас маданиятини юқори баҳолайди.
Мавсумдаги натижалар эътиборга лойиқ
2024/2025 йилги Лига 1 мавсумида Барколя 34 та баҳсда иштирок этиб, рақиб дарвозасини 14 марта ишғол қилди ҳамда 10 та голли узатма амалга оширди. Унинг бундай самарадор ўйини Европа грандларини бефарқ қолдирмади.
Грандлар орқасини қўймасликка тайёр
Гарчи футболчининг шахсий хоҳиши ва мураббийнинг қўллаб-қувватлаши уни ПСЖда сақлаб қолиши мумкин бўлса-да, "Арсенал", "Челси" ва "Бавария" уни қўлга киритишдан ҳали ҳам умид узмаган. Айниқса, трансфер ойнаси очилгандан сўнг кутилмаган таклифлар ва келишувлар кузатилиши мумкин.