Дарвозабон учун янги қоида тарихда илк бор қўлланди
Франциялик тажрибали ҳакам Клеман Тюрпен "Ульсан Хюндай" ҳамда "Мамелоди Сандаунз" (0:1) жамоалари ўртасидаги учрашувда ушбу янги тартибни амалга татбиқ этган илк ҳакам сифатида тарихга кирди. Ушбу беллашув "F" гуруҳи 1-туридан ўрин олган бўлиб, 83-дақиқада ажойиб воқеа рўй берди.
Жанубий Африка клуби "Мамелоди Сандаунз"нинг дарвозабони Ронуэн Уильямс тўпни қўлида жуда узоқ ушлаб тургани сабабли ҳакам томонидан бурчак зарбаси белгиланди. Бу футбол тарихида биринчи марта қайд этилган ҳолат бўлиб, бутун жаҳон ОАВсида кенг муҳокамаларга сабаб бўлди.
Янги қоида 2025 йил март ойида Футбол ассоциациялари халқаро кенгаши (IFAB) томонидан илгари сурилган эди. Унга кўра, агар дарвозабон тўпни 8 сониядан ортиқ вақт қўлида ушлаб турса, ҳужумчи жамоа фойдасига бурчак зарбаси билан жазоланади. Бу таклиф аввал бошда синқоидалик сифатида кўрилган бўлса-да, кўп ўтмай IFAB томонидан расман тасдиқланди ва фаол тарзда қўллана бошланди.
Янги тартиб футболда вақтни самаралироқ назорат қилиш ва ўйин суръатини ошириш мақсадида жорий этилган. Шу пайтгача дарвозабонлар учун 6 сониялик чеклов назарий жиҳатдан мавжуд бўлган, аммо амалиётда у деярли татбиқ этилмасди. Янги 8 сониялик аниқ лимит ва унга жавобан бурчак тўпи билан жазолаш механизми эса бу масалани янада таъсирли ва самарали этмоқда.
Футбол экспертлари янги қоидага нисбатан икки хил фикрда: айримлар бу қадамни ўйиннинг тезкорлигини оширадиган ижобий ташаббус деб баҳоласа, бошқалар уни дарвозабонларга нисбатан жуда қаттиқ чора деб ҳисоблашмоқда. Аммо қайси томондан қаралмасин, футбол ривожидаги бу каби янгиликлар уни янада замонавий ва томошабоп спорт турига айлантиришда муҳим аҳамият касб этади.