Apple букланадиган iPhone ишлаб чиқаришга жиддий киришмоқда
Куо таъкидлаганидек, Apple қурилманинг йиғма қисмларини етказиб берувчи Foxconn заводида букланадиган iPhone лойиҳаси сентябр-октябр ойларида расман бошланади. Гарчи смартфоннинг кўплаб муҳим компонентлари ҳозирда ишлаб чиқилаётган бўлса ҳам, унинг энг қизиқарли қисми – букланадиган дисплей аллақачон тасдиқланган.
Маълумотларга кўра, букланадиган iPhone 2026 йилнинг ёз ойларида оммавий ишлаб чиқарилишга киришилади ва ўша йилнинг кузида кенг оммага таништирилади. Apple ушбу инновацион қурилмани iPhone 18 туркумининг бир қисми сифатида тақдим қилишни режалаштирган.
Ҳозирча букланадиган iPhone ҳақида расмий хабарлар мавжуд эмас. Лекин инсайдер маълумотларига кўра, смартфон 7,8 дюймли эгилувчан OLED-дисплей билан жиҳозланади ва бу планшет экрани ўлчамига яқин бўлади. Букланган ҳолда эса телефоннинг ташқи дисплейи диагонали 5,5 дюймга тенг бўлади.
Бундан олдин Apple маҳсулотлари бўйича машҳур таҳлилчи Марк Гурман янги қурилманинг асосий икки хусусияти ҳақида маълум қилган эди. Биринчиси – дисплейда букланиш жойининг деярли кўринмаслиги, иккинчиси эса рақобатчиларникидан кўра анча мустаҳкам ва юқори сифатли бўлган шарнир тизими. Таҳлилчиларнинг фикрича, ушбу шарнир зангламайдиган пўлат ва титан қўшилмасидан тайёрланиши мумкин.
Янги букланадиган смартфоннинг тахминий нархи 2000 доллардан 2500 долларгача бўлиши айтилмоқда. Apple мазкур қурилмаси учун талаб юқори бўлиб, чиқарилганидан кейинги илк йилда тахминан 6 миллион донагача сотишни режалаштирмоқда.
Айтиш жоизки, Apple букланадиган смартфон бозорига кирмаган ягона катта технология компанияси бўлиб турибди. Компаниянинг асосий рақобатчиси ҳисобланган Samsung эса бу йилнинг ўзида учга букланадиган биринчи смартфонини чиқаришга тайёргарлик кўряпти. Шу билан бирга, Samsung iPhone 16 нархига тенг бўлган арзонроқ букланадиган қурилмани ҳам тақдим қилишни режалаштирмоқда.