Chrome'нинг янги версиясида ишлаш тезлиги ошди

Google Chrome браузери янги оптимизациялар орқали ўз тезлигини 10% га оширди, деб хабар берди Overclockers.ru. Бу натижага Blink рендеринг муҳаррикидаги хотира ва кэш бошқарувини яхшилаш орқали эришилди.

Янгиланишлар доирасида DOM, CSS ва бошқа компонентлардаги ички маълумот тузилмалари қайта ишлаб чиқилди. Бу ўзгаришлар орқали Chrome'нинг хотирадан фойдаланиши самаралироқ бўлди ва ЦП кэшларидан фойдаланиш яхшиланди.

Шунингдек, Oilpan номли чиқиндиларни йиғиш тизимига тўлиқ ўтиш орқали malloc функциясидан фойдаланиш камайтирилди. Бу DOM каби соҳаларда ишлаш тезлигини оширди.

Стринглар билан ишлашда ҳам яхшиланишлар амалга оширилди. Янгиланган хешлаш усули орқали перформанс оширилди. Кэшлаш усуллари ҳам яхшиланиб, кэшга тушиш даражаси ошди ва хато даражаси камайтирилди.

Бу ўзгаришлар Chrome'нинг Speedometer 3.0 тестидаги натижаларини яхшилади ва браузернинг умумий ишлаш самарадорлигини оширди.