“Барселона”дан учралган аламли мағлубият “Реал”да катта ўзгаришларга сабаб бўлмоқда

Испания Ла Лигасининг 35-турида «Реал Мадрид» «Камп Ноу» стадионида ўзининг ашаддий рақиби «Барселона»га қарши ўйнаб, драматик баҳсда 3:4 ҳисобида мағлуб бўлди ва чемпионлик умидларини деярли барбод қилди. Мазкур йирик мағлубиятдан сўнг «қироллик клуби» раҳбарияти жамоа таркибида жиддий ўзгаришлар қилишга қарор қилди. Fichajes нашрининг ёзишича, клуб айрим юлдуз футболчилар билан хайрлашишга тайёрланмоқда.

Трансферлардан тушган маблағ эса янги истеъдодли футболчиларни сотиб олиш учун сарфланиши кутилмоқда. Қуйидаги футболчилар трансфер бозорига чиқариладиган асосий номзодлар сифатида кўрилмоқда:

Орельен Тчуамени – жамоа бош мураббийи Карло Анчелотти ва мухлисларнинг катта ишончини қозона олмаган Франция терма жамоаси ярим ҳимоячиси мавсум давомида турли танқидларга дуч келган эди. «Барселона» билан бўлган ҳал қилувчи ўйиндаги суст ҳаракатлари туфайли унга бўлган босим янада ортиб кетди. «Реал» мутасаддилари 90 миллион евро ва ундан юқори таклифлар бўлса, футболчини сотиб юборишга тайёр эканликларини маълум қилди.

Фран Гарсия – мавсум бошида жамоанинг асосий ҳимоячиси сифатида катта умидлар билан таркибга жалб қилинган испаниялик чап қанот ҳимоячиси Фран Гарсиянинг ўйини ҳам бу мавсумда барқарор эмас эди. «Барселона»га қарши ўтказилган баҳсда у рақибнинг ёш юлдузи, 17 ёшли Ламин Ямалнинг ҳаракатларига қарши етарлича кураша олмади. Ҳозирда Гарсияга Англиянинг «Борнмут» клуби жиддий қизиқиш билдирмоқда. Мадридликлар эса уни тахминан 15-20 миллион евро атрофидаги трансфер суммасига сотишни режалаштирган.

Дани Себальос – бир пайтлар Европанинг энг истиқболли ярим ҳимоячиларидан бири сифатида баҳоланган Дани Себальос ҳам «Реал»даги имкониятлардан фойдалана олмади. Айниқса, «Барселона»га қарши бўлган ҳал қилувчи баҳсда унинг марказий зонадаги суст ва самарасиз ҳаракатлари жамоанинг мағлубиятига сабабчи бўлган омиллардан бири сифатида кўрилди. Мадрид клуби бир неча йил аввал 45 миллион еврога баҳоланган бу футболчини энди тўрт баробар арзонроқ нархга сотиб юборишга тайёр.

Экспертларнинг фикрича, «Реал Мадрид»нинг ушбу қарорлари ёзги трансфер бозорида катта ўзгаришларга сабаб бўлади ва жамоа таркиби янги қон билан бойитилади. Шу билан бирга, мадридлик мухлислар клубнинг янги трансферлари ва қандай футболчилар билан шартнома имзолашини сабрсизлик билан кутмоқда.

Zamin.uz таҳририяти трансфер бозоридаги янгиликларни диққат билан кузатиб, сўнгги маълумотларни ўз ўқувчиларига тезкор етказишда давом этади. Биз билан қолинг!