Жоржина Родригес: “Дўстларим доим тўй қачон, деб сўрашади”

Криштиану Роналду Жоржина Родригес билан 2016 йилдан бери яқин муносабатда бўлиб келади. Лекин улар ҳозиргача расмий тарзда турмуш қурмаган. Жоржина “Мен – Жоржина” реалити-шоусида португалиялик футболчи билан муносабатлари ҳақида гапирди. Бу ҳақда Yahoo нашри хабар бермоқда.

^{Фото: Yahoo}
У дўстлари доим “тўй қачон” деб ҳазиллашиб туриши ҳақида айтди:

"Дўстларим ҳар доим тўй ҳақида ҳазиллашиб, “Қачон тўй?” деб сўрашади. Улар Женнифер Лопеснинг “Ring” қўшиғи чиққанидан бери уни менга атаб куйлашади (қўшиқда “Узук қани?” деган сўзлар бор). Лекин бу фақат менга боғлиқ эмас", деди Родригес.

Криштиану Роналду эса бу борада қуйидагича изоҳ берди:

"Мен ҳар доим унга биз қачондир турмуш қурамиз, деб айтаман. Фақат ўша вақт келишини кутиш керак. У нимани назарда тутаётганимни яхши билади. Бу бир йилдан кейин ҳам, ярим йилдан кейин ҳам, бир ой ичида ҳам бўлиши мумкин. Аммо мен 100 фоиз аминманки, бу кун, албатта, келади".

2018 йилда футболчи Жоржинага турмуш қуриш таклифини билдирган, бироқ номаълум сабабларга кўра бу амалга ошмай қолган.

Маълумот учун, бу жуфликнинг 2 нафар фарзанди бор — Алана Мартина (2017 йилда туғилган) ва Белла Эсмералда (2022 йилда туғилган). 2022 йилда Жоржина эгизак фарзанд кутаётган эди, аммо улардан бири туғилганидан кейин вафот этган.

Бундан ташқари, Роналдунинг Жоржина билан танишишидан олдин дунёга келган фарзандлари ҳам бор. 2010 йилда туғилган Криштиану Роналду Жр ва 2017 йилда суррогат она орқали туғилган эгизаклар — Эва ҳамда Матео.