2 очко етарли, 3 очко кам — Ўзбекистоннинг Мундиалга чиқиш имконияти
Дастлаб, турнир жадвалидаги ҳолатга назар соламиз. 7-турдан кейин А гуруҳида Эрон етакчилик қилмоқда. Ҳозирда форслар 19 очко билан ЖЧ йўлланмасини 99 фоизга ҳал қилган. 8-турда бўладиган Ўзбекистонга қарши баҳсдаги дуранг ҳам Эронни Америка қитъасида бўладиган Мунидалга олиб чиқади. Ўзбекистон 16 очко билан 2-ўринни эгаллаб турибди. Жамоа ортда қолган 7 турда 5 ғалаба, 1 дуранг ва 1 мағлубият қайд этган. 10 очко тўплаган БАА ва Қатар мос равишда 3—4-ўринлардан жой олган. Қирғиз Республикаси (3 очко) ҳамда Шимолий Корея (2 очко) аутсайдер сифатида охирги ўринларда кетмоқда.
Фото: ЎзПФЛ
Ўзбекистоннинг кейинг тақвими қандай?
Ўзбекистон терма жамосини олдинда 3 та муҳим баҳс кутиб турибди.
- 25 март Эрон — Ўзбекистон
- 5 июнь БАА — Ўзбекистон
- 10 июнь Ўзбекистон — Қатар
Кўриниб турибдики, Темур Кападзе жамоасини кутиб турган ҳар учта баҳс ҳам муҳим аҳамият касб этади. Сабаби Эрондан ташқари қолган икки жамоа айнан тўғридан-тўғри ЖЧга чиқиш учун Ўзбекистон билан рақобат олиб бормоқда. Агар 25 март куни жамоамиз Эронда имкониятни бой берса ва БАА ҳамда Қатар ўз ўйинларида ғалаба қозонса, уларда мотивация икки баробар ошиб кетиши мумкин. Сабаби рақибларнинг, айниқса амирликлар жамоасининг кейинги тақвими нисбатан осон. Кўриб чиқамиз.
БАА терма жамоаси тақвими:
- 25 март Шимолий Корея — БАА
- 5 июнь БАА — Ўзбекистон
- 10 июнь Қирғизистон — БАА
Қатар терма жамоаси тақвими:
- 25 март Қирғизистон — Қатар
- 5 июнь Қатар — Эрон
- 10 июнь Ўзбекистон — Қатар
Кўриниб турибдики, 2-ўрин учун кураш олиб бораётган жамоалар ичида энг осон тақвим БААга тегишли. Улар икки марта гуруҳ аутсайдерлари билан ўйнаса, бир марта ўз майдонида Ўзбекистонни қабул қилади. Қатарда эса вазият чигал кўринишда. Улар дастлаб Қирғизистонга сафар қилса, қолган икки баҳсда гуруҳ етакчилар билан ўйнайди.
Имкониятлар қандай?
Албатта, Ўзбекистоннинг имконияти ўз қўлида. Кўп нарса 25 мартда бўладиган Эронга қарши баҳсда аниқ бўлади. Мисол учун, агар Ўзбекистон сафарда мағлубиятга учраса ва БАА Шимолий Кореядан, Қатар эса Қирғизистондан устун келса, вакилларимиз ва рақиблар ўртасидаги фарқ 3 очкони ташкил қилади. Кейинги беллашувлар Темур Кападзе учун ҳаёт-мамот масаласига айланади.
Сабаби, жамоа 9-турда Амирликка сафар қилади. Агар ғалаба ёки дуранг қайд этсак, яхши. Аммо имкониятни бой берилса, БААда иккинчи ўринга чиқиб олиш имконияти катта бўлади. Чунки ҳар икки жамоада ҳам 16 очко бўлади, лекин амирликлар жамоасида тўплар нисбати яхшироқ — +6. Ўзбекистонда эса бу кўрсаткич +4 ни ташкил қилади. Шунда охирги турдаги Қатар билан ўйинда катта ҳисобда ғалаба қозонишимиз талаб этилади, чунки рақибимиз БАА Қирғизистонга сафар қилади ва улар ушбу баҳсда ғалабани ўз томонига оғдириш учун барча нарсага тайёр эканлиги ҳеч кимга сир эмас.
Фото: ЎФА
Қатарда ҳам имконият бор. Улар 25 март куни Қирғизистон майдонига сафар қилади. Агар улар Бишкекдан ғалаба билан қайтса, 5 июнь куни Доҳада Эронни қабул қилади. Ўша баҳсга қадар Эрон ЖЧ йўлланмасини ҳал қилса, катта эҳтимол билан қатарликлар ғалаба учун ҳаракат қилади ва охирги турда Тошкентга келади. Агар ушбу баҳсга қадар Қатар йўқотишларсиз келса, Темур Кападзе жамоасига бир оз қийин бўлиши мумкин.
Ўзбекистон учун яхши сценарий
Журналист Хушнудбек Худойбердиев айтганидек, яхши сценарийлар ҳам бор. Масалан, Ўзбекистон қолган учта ўйинда ғалаба қозониши ҳам шарт эмас. Жамоа Эронда ютқазса ҳам майли. Энг асосийси БАА ҳамда Қатар билан дуранг ўйнаш керак. Шунда “оқ бўрилар” 100% ЖЧга чиқади. Чунки жамоанинг очколари 18 та бўлади ҳамда БАА ва Қатар қолган 2 та ўйинида ютса ҳам, Ўзбекистонга ета олмайди. Кўриб турганингиздек, барчаси уларнинг ўз қўлида. Шунчаки, асосий 2 та рақибдан 1 очко бўлса ҳам олиш уддаланса кифоя. Яъни, БАА ва Қатар билан камида дуранг ўйнаш, яъни ютқазмаслик. Бўлди, тамом.
Бошқа сценарийлар
Яна бошқа сценарийлар ҳам бор, аммо улар Ўзбекистонга боғлиқ эмас. Яъни БАА ҳамда Қатар бошқа ўйинларда очко йўқотади. Масалан, қўшни Қирғизистон сюрприз тайёрлаб, ўз уйида БААдан ҳам, Қатардан ҳам очко олиб бериши мумкин.
Ўта оптимистик сценарий бўйича, Ўзбекистон 3 кундан кейин ҳам ЖЧга расман чиқиши мумкин. 2 та вариант бор:
1. Эрон билан дуранг ўйнаш керак, параллел баҳсларда БАА ҳамда Қатар ютқазиши шарт;
2. Эронни мағлуб этиш керак, параллел баҳсларда БАА ҳамда Қатар ёки дуранг ўйнайди, ёки ютқазади.
Иккала вазиятда ҳам Ўзбекистон расман ЖЧга чиқади. Қолган 2 та ўйин, шунчаки, расмиятчилик учун бўлади. Албатта, бунга ишониш қийин, аммо эҳтимоллар назариясида шунақа имконият йўқ эмас.