13 адам қаза болған хостелдегі өрт: Мемлекеттік органдар Almaty Hostel жөнінде білмеген, қонақүй тіркеуде болмаған
- Бұл хостел жөнінде әкімдікте де, өзге мемлекеттік органдада да ақпарат болмаған. Төтенше жағдай департаменті мен өзге де мемлекеттік органдардың шағын бизнес нысандарын тексеруге құқығы жоқ. Бірақ 13-17 қараша аралығында “Жатақхана” акциясы жүргізілді, соның аясында жатақханалар мен жатақханаға берілген ғимараттар тексерілді. Алайда аталған хостел тіркеуде болмағандықтан ол тексерілмеді, - деді министр.
30 қарашада таңертең Алматы орталығындағы хостелдердің бірінде өрт шығып, 13 адам қаза болған. Алдын ала ақпаратқа қарағанда, олар газдан уланып өлген. Қаза болғандардың тізімі ресми түрде расталғаннан кейін жарияланатыны хабарланды.
Өрт кезінде хостелде 72 адам болған: 59-ы өз бетімен сыртқа шыққан. Арасында шетел азаматтары да бар. Өрттен 5 адам зардап шеккен: 1 адам токсикология бөліміне жатқызылды. Алдын ала ақпарат бойынша, газдан уланған. Тағы 4 адамның жарақаттары таңылған. Олар эвакуация кезінде денелерін жарақаттап алған. Оларға тиісті медициналық көмек берілген.
Қазір өрттің шығу себептері анықталып жатыр. Бұған дейін хостелдегі өртке самокаттың зарядкаға қойылуы себеп болуы мүмкін деп хабарланған. Осы болжам жөнінде бейсенбі күні журналистер сұраған кезде төтенше жағдай министрі "ол жөнінде айту әлі ерте" деді. Ол өзі оқиға орнында болғанын, самокат көрмегенін жеткізді.
Алматы төтенше жағдай департаментінің хабарлауынша, 1956 жылы салынған үш қабатты тұрғын үйдің бірінші қабаты мен жертөлесіне орналасқан хостел 1,5 ай бұрын ашылған және жертөле бөлігі заңсыз хостелге айналдырылған. Хостелде өрт сөндіру құралдары болмаған, алайда сигнализация ойнаған. Оқиғаға байланысты "Өрт қауіпсіздігі талаптарын бұзу" бабы бойынша қылмыстық іс тіркелді.
Хостелдегі өртке байланысты үкімет комиссия құрылған.
Бейсенбілік брифинг кезінде өрттен қаза болған әрбір Қазақстан азаматына қала әкімдігі 1 млн теңге бөлетіні, қаза болған шетелдіктерге мәйіттерді еліне жеткізу бойынша көмектесетіні айтылды.