განათლების სამინისტრომ იმერეთის საჯარო სკოლაში მოსწავლეზე ბულინგის საქმის შესწავლა დაიწყო
"საზოგადოებას გვსურს ვაცნობოთ, რომ ფაქტის გახმაურებისთანავე პროცესში ჩაერთო საქართველოს განათლებისა და მეცნიერების სამინისტროს ყველა შესაბამისი სტრუქტურული ერთეული, მათ შორის მანდატურის სამსახურის ფსიქოსოციალური მომსახურების ცენტრი და ფსიქოლოგები უკვე მუშაობენ როგორც ბავშვებთან, ასევე მათ მშობლებთან", - წერია განცხადებაში.
აქვე აღნიშნულია, რომ "სამინისტროს შიდა აუდიტმა უკვე დაიწყო მოკვლევა და სწავლობს სკოლის დირექტორის ან ადმინისტრაციის სხვა წარმომადგენლების მხრიდან შესაძლო გადაცდომის ფაქტებს".
რამდენიმე საათია, რაც ცნობილი გახდა, რომ იმერეთის ერთ-ერთ საჯარო სკოლაში მე-9 კლასის მოსწავლეს თანასკოლელები, თანაკლასელები აიძულებდნენ თვითდაზიანებები მიეყენებინა - ამის შესახებ ფეისბუკში ერთ-ერთმა მოქალაქემ გამოაქვეყნა პოსტი, რომელსაც თან ერთვოდა მუქარის შემცველი წერილის სურათი. ამავე ფოტოში ჩანდა, რომ წერილთან ერთად სკოლის მოსწავლეს ბასრი საგანი გაუგზავნეს იმისთვის, რომ მას თვითდაზიანებები მიეყენებინა.
"ჩანთას რომ ალაგებდა, სკოლაში როცა უნდა წასულიყო, უნახავს ფურცელი იმ ტექსტით, რაც ყველამ იცით. მასწავლებლების შეცოდების გამო ბავშვმა საღამომდე დამიმალა ეს ფაქტი... საღამოს სამზარეულოში გაფითრებული მეუბნება ცრემლიანი თვალებით - „დედა, ან სკოლიდან გადამიყვანე, ან მიშველე რამე“ და მაწვდის ფურცელს", - უთხრა ბავშვის დედამ ჟურნალისტებს და ასევე აღნიშნა, რომ ინფორმაცია მიაწოდა სკოლის ადმინისტრაციასაც.
ფსიქოლოგ მაია ცირამუას თქმით, შემზარავია ის ფაქტი, რომ მშობელს დასჭირდა გაესაჯაროებინა წერილი იმის გამო, რომ "როგორც ჩანს, დიდი ხანია გრძელდება დევნა, შევიწროება და ამაზე სკოლა არ რეაგირებს". შინაგან საქმეთა სამინისტროში აცხადებენ, რომ გამოძიება დაიწყო სისხლის სამართლის კოდექსის 150-ე (მუქარის) მუხლით.
ცირამუა ფეისბუკში გამოქვეყნებულ პოსტში კიდევ ერთ გარემოებაზე ამახვილებს ყურადღებას:
"მესმის, შემზარავია, რასაც წერს, გვაბრაზებს და გვაშინებს მისი სისასტიკე, მაგრამ ერთი წამით წარმოიდგინეთ, რა მდგომარეობაშია ეს ბავშვი, ასეთი რამ რომ მოაფიქრდა (სავარაუდოდ, თავადაც გამოუცდია ის, რასაც თანაკლასელს სთავაზობს - თვითდაზიანებას ვგულისხმობ), მერე წერილი დაწერა და კიდევ უფრო მძიმე მუქარა მოაყოლა. ყველაფერი უნდა გაკეთდეს იმისათვის, რომ გაირკვეს - რატომაა ეს ბავშვი ასეთ მდგომარეობაში და მერე დიდი სამუშაოა ჩასატარებელი, რომ გადარჩეს. ცხადია, სერიოზული დახმარება სჭირდება მისი აგრესიის სამიზნეს, იმ ბავშვს, რომელიც ალბათ დიდი ხანია მარტოა ამ პრობლემის პირისპირ".