Хакеісты „Віцебска” закінулі сем шайб „Лакаматыву” ў матчы беларускай экстралігі
Трыма матчамі ў Віцебску, Магілёве і Лідзе працягнуўся рэгулярны чэмпіянат беларускай хакейнай экстралігі. Лідэр сезона салігорскі „Шахцёр” сустракаўся на выездзе з „Лідай”. Па ходу паядынку „гарнякі” вялі ў дзве шайбы, але да канца другога перыяду „рыцары” здолелі адыграцца. У дэбюце заключнай 20-хвілінкі Міхаіл Шалагін зноў вывеў „Шахцёр” наперад – 3:2, але на гэты раз адказаць лідчане не змаглі. Паралельна на поўначы краіны адносіны высвятлялі другая і трэцяя каманды бягучага розыгрышу – „Віцебск” і „Лакаматыў”. У стартавай трэці супернікі закінулі па разу, а затым здарыўся хет-трык форварда віцябчан Ахмеда Гімбатава і дубль яго партнёра па клубу Яўгена Саламонава. У канцоўцы каманды яшчэ раз абмяняліся галамі, у выніку 7:2 на карысць „мядзведзяў”. У трэцім матчы вечара „Магілёў” перамог „Дынама-Маладзечна” 5:2 і пакінуў апошняе месца экстралігі, спусціўшы туды „Ліду”.
„Мяшкоў Берасце” выйграў у гандбалістаў „Гомеля” ў SEHA-лізе
„Мяшкоў Берасце” выйграў другі паядынак на старце групавога этапа SEHA-лігі. Дзейныя пераможцы гэтага турніру перайгралі на выездзе гандбалістаў „Гомеля” з лікам 34:25. У другім туры спаборніцтваў у групе B віцэ-чэмпіёны мінулага сезона гандбалісты мінскага СКА разграмілі ў Магілёве „Машэку” – 48:30.
Беларускі форвард „Кароны” Яўген Шыкаўка дапамог сваёй камандзе адолець „Сталь”.
Наш суайчыннік адкрыў лік на 20-й хвіліне чарговага матча чэмпіяната Польшчы ў экстракласе. Гэта яго першы гол у сезоне. Беларускі форвард „Сталі” Ілля Шкурын выйшаў на поле ў стартавым складзе, але быў заменены на 81-й хвіліне матча.
„Барселона” абыграла „Севілью” ў матчы чэмпіянату Іспаніі дзякуючы аўтаголу Серхіа Рамаса
„Барселона” на сваім полі абыграла „Севілью” ў матчы чэмпіянату Іспаніі па футболе. Сустрэча завяршылася з лікам 1:0. На 76-й хвіліне абаронца гасцей Серхіа Рамас зрэзаў мяч у браму сваёй каманды. У турнірнай табліцы „Барселона” набрала 20 ачкоў і займае першае месца, „Севілья” мае 7 ачкоў і ідзе 12-й.
Беларускае Радыё Рацыя
Artykuł Хакеісты „Віцебска” закінулі сем шайб „Лакаматыву” ў матчы беларускай экстралігі pochodzi z serwisu БЕЛАРУСКАЕ РАДЫЁ РАЦЫЯ.