«Հնարավոր է՝ Հայաստանը փորձի ինձ հանձնել, բայց չի կարողանալու». Մովսես Հակոբյան
«Հնարավոր է՝ Հայաստանը փորձի ինձ հանձնել, բայց չի կարողանալու». Մովսես Հակոբյան
Ադրբեջանը Լաչինի անցակետում՝ Արցախից Գորիս մտնելու փորձի ժամանակ, ձերբակալել է Արցախի Հանրապետության Պաշտպանության բանակի նախկին հրամանատար Լևոն Մնացականյանին:
Տեղեկությունը դեռ երեկ հայտնել էր ՏԱՍՍ-ը՝ հղում կատարելով Մնացականյանի շրջապատից իր աղբյուրին:
Հիշեցնենք, որ օրեր առաջ անցակետում ձերբակալվել էր Արցախի նախկին պետնախարար Ռուբեն Վարդանյանը, որին արդեն տեղափոխել են Բաքու, անմիջապես ծանր հանցագործությունների համար մեղադրանք առաջադրելուց հետո 4 ամսով կալանավորել են:
Արցախի նախկին արտգործնախարար Դավիթ Բաբայանը երեք օր առաջ տեղեկացրել էր, որ Ադրբեջանն իրեն պահանջել է, որպեսզի ներկայանա Բաքու, և որպեսզի չվնասի Արցախում մնացած հայությանը, որոշել է գնալ Շուշի։ Մինչև այս պահը Դավիթ Բաբայանից որևէ տեղեկություն չկա։
168.am-ի հետ զրույցում ՀՀ ԶՈՒ գլխավոր շտաբի նախկին պետ, նախկին գլխավոր ռազմական տեսուչ, գեներալ-գնդապետ Մովսես Հակոբյանն ասաց՝ կասկած չկա, որ հաջորդիվ իրեն է Ադրբեջանը պահանջելու։
«Մտահոգություններ չունեմ, բայց գիտեմ, որ ինձ էլ են պահանջելու։ Հնարավոր է՝ Հայաստանը փորձի ինձ հանձնել, բայց չի կարողանալու»,- կարճ նշեց Մովսես Հակոբյանը։
Հարցին, թե 90-ականներին Ադրբեջանի զինված ուժերն Արցախում խաղաղ բնակիչների նկատմամբ ահաբեկչական բազմաթիվ գործություններ է կատարել, այդ թվում՝ 2016 թվականի ապրիլյան, 44-օրյա պատերազմների, Ջերմուկի դեմ մարտական գործողությունների և սեպտեմբերի 19-ի հարձակման ժամանակ, ինչո՞ւ հայկական կողմը ևս չի կազմել այդ ահաբեկիչների «սև ցուցակը» և այսօր ինչո՞ւ այն չի դնում սեղանին, Մովսես Հակոբյանը պատասխանեց.
«Ունեմ՝ 70 մլն-ի, հետո՞ ինչ, դրած է սեղանին, հետո՞։ Մի բան որ մտածում են, պետք է կարողանան կյանքի կոչել, այսինքն՝ դա կյանքի կոչողներ ու հնարավորություններ են պետք»:
Զվարթ Խաչատրյան
Մովսես Հակոբյան, սև ցուցակ, Ադրբեջանի պահանջ, հայ գեներալների ցուցակ
Ադրբեջանը Լաչինի անցակետում՝ Արցախից Գորիս մտնելու փորձի ժամանակ, ձերբակալել է Արցախի Հանրապետության Պաշտպանության բանակի նախկին հրամանատար Լևոն Մնացականյանին: