650 ათასი ლარი ეკლესიისა და თაღის გასანათებლად
ბათუმის მერია ღვთისმშობლის სახელობის ეკლესიაზე მინათებების მოწყობასა და რკინის თაღის განათებას გეგმავს, რისთვისაც ჯამში 650 ათასამდე ლარი დასჭირდება. ეს თანხა იმ საპროექტო-სახარჯთაღრიცხვო დოკუმენტებითაა განსაზღვრული, რომელიც მერიის სამმართველომ კერძო კომპანიას მოამზადებინა.
დოკუმენტების მიხედვით, ეკლესიაზე მინათებების მოსაწყობად საერთო ხარჯთაღრიცხვით 199 659 ლარია საჭირო. ეკლესიის ფასადზე 205 ცალი დეკორატიული სანათი უნდა დაამონტაჟონ.
შარტავას გამზირზე მდებარე რკინის თაღის განათებისთვის კი, 449 948 ლარია გაწერილი. პროექტით თაღზე ჯამში 1 308 დეკორატიული სანათი მოეწყობა.
სამუშაოების საბოლოო ღირებულება ელექტრონული ტენდერით დაზუსტდება, რომლის გამოცხადებასაც მერიის საქალაქო ინფრასტრუქტურისა და კეთილმოწყობის სამმართველო გეგმავს.
სამმართველო ასევე გეგმავს გონიო-კვარიათში ზღვისპირა ბილიკის განათების სამუშაოების [მეორე ეტაპი] შესყიდვასაც, რომლის ფარგლებშიც დაგეგმილია არსებულ 126 განათების ბოძზე სანათების მოწყობა, ასევე 8 განათების ლითონის ბოძისა და სანათების მოწყობა.
მერიის სამმართველო ამ ეტაპზე ბაზარს იკვლევს. ბაზრის კვლევის დოკუმენტაციას თან ახლავს საკვალიფიკაციო მოთხოვნები და ტექნიკური მონაცემები.
სამმართველო დაინტერესებულ მხარეებს სთხოვდა წერილობით ეცნობებინათ მისთვის, ჰქონდათ თუ არა ზემოთ აღნიშნული საკვალიფიკაციო მოთხოვნების შესაბამისი გამოცდილება.