Озод Европа/Озодлик радиоси президенти ўзбек расмийларининг қўрқитиш кампаниясини қоралади

Қароргоҳи Прагада жойлашган Озод Европа/Озодлик радиоси президенти вазифасини бажарувчи Жеффри Гедмин 11 июль куни Ўзбекистон ҳукумати томонидан дастакланган ҳамда Озодлик радиосини обрўсизлантиришга қаратилган кампанияга жавобан баёнот берди.


“Ўзбек расмийлари ҳаққоний хабарлар билан ишлаш ўрнига журналистларимиздан хусуматли қўрқитиш кампанияси ва цензурани кучайтириш билан қасос олмоқда. Тарихимиз шуни кўрсатадики, бизнинг аудиториямизга ишончли ахборот керак бўлганида уни албатта излайди ва кўпинча олдингидан кўпроқ сонда излашади”, дейилган Озодлик президенти баёнотида.


Озодлик радиоси раҳбариятининг баёноти Ўзбек хизмати эълон қилган навбатдаги журналистик суриштирув ортидан Озодлик журналистларига қарши бошланиб кетган қоралаш кампанияси манзарасида янграмоқда.


8 июль куни Озодлик учинчи муддат президентликка сайланаётган Шавкат Мирзиëев бошқарувидаги непотизмга бағишланган видеосуриштирувни эълон қилди. “Мирзиëевлар амирлиги” деб номланган  суриштирув Мирзиёев оиласинг кўп сонли аъзолари юқори ҳукумат лавозимларига тайинланиши баробарида мамлакат иқтисодиётининг бутун бошли соҳалари устидан назорат ўрнатганини ўртага чиқарган. 




 


Ўзбекистон президенти администрацияси Озодликнинг суриштирув эълон қилинишидан бир ҳафта аввал Президент матбуот хизматига йўллаган саволларини жавобсиз қолдирди.


Шанба куни Тошкент вақти билан кечки соат 18.00 да YouTube видеопорталида премьераси бошланган суриштирув видеосини тўрт соат ичида 400 мингга яқин одам кўрган. Орадан 4 соат ўтиб, видео блокланди. Видео Ўзбекистон президентининг матбуот хизматига тегишли бўлган 21 секундлик видеокадр  гўёки муаллифлик ҳуқуқини бузгани важидан блокланган. Уни блоклашни сўраган Канададаги компания кейинроқ "хатолик" бўлганини айтиб, видеони блокдан чиқарди. Озодлик ҳозирда бу юзасидан қўшимча текширув олиб бормоқда. 


Айни пайтда очиқ бўлган видеосуриштирув YouTube да 11 июль оқшомигача қарийб 1 миллион марта кўрилди. 


Президент Мирзиёев  ҳукуматининг очиқлик ҳақидаги баёнотларига қарамасдан  Озодлик  вебсайти Ўзбекистонда блокланганича қолмоқда. Озодлик тармоқларда суриштирувлар  ҳақида пост ёзган қатор маҳаллий фаол, блогер ва журналистларнинг босимга учрагани ҳақида ёзган.


Шу йил майида Париждаги “Чегара билмас мухбирлар” (RSF) ташкилоти Ўзбекистонда журналист ва блогерларга босимлар кучайиб бораётганини қайд этган.


Ҳисоботга мувофиқ, Ўзбекистонда сўз эркинлиги ўтган йилгига қараганда тўртта позицияга ёмонлашиб, 133-ўриндан 137-ўринга тушган.