რეორგანიზაცია არასასურველი კადრების მოსაშორებლად ტარდება, მიზანი კონტროლი და ცენზურაა - საია კულტურის სფეროში საკადრო ცვლილებებზე
"ახალგაზრდა იურისტთა ასოციაციის" ანგარიში ეყრდნობა სამინისტროს დაქვემდებარებულ დაწესებულებებში მომუშავე იმ ადამიანების სამსახურიდან გათავისუფლების შემთხვევების ანალიზს, ვინც მათ, საიას, მიმართა სამართლებრივი დავის თხოვნით.
ანგარიშში განხილული საქმეების ანალიზით დგინდება, რომ კულტურის სამინისტროს დაქვემდებარებაში არსებული დაწესებულებიდან არასასურველი დასაქმებულების ჩამოშორება ხდება შრომის კანონმდებლობის სრული უგულებელყოფითა და მათ უფლებებში უხეში ჩარევით.
„თითოეულ შემთხვევაში რეორგანიზაცია განხორციელდა არა საჯარო სამსახურის ინტერესებიდან გამომდინარე კანონმდებლობით დადგენილი წესით, არამედ არასასურველი კადრების გათავისუფლების შესანიღბად. იმ დაწესებულებებში, საიდანაც საიას დაცვის ქვეშ მყოფი პირები გათავისუფლდნენ, კადრების ოპტიმიზაციის მიზნით შეფუთული რეორგანიზაციის შემდგომ არაერთი კონკურსი გამოცხადდა და უწყებებში ახალი კადრები დაინიშნნენ. არ არსებობს რეორგანიზაციის საფუძვლით გათავისუფლებების კანონიერად მიჩნევის წინაპირობები, არამედ ისინი დაეფუძნა პირად შეხედულებებს ან/და სხვადასხვა ნიშნით გამოხატულ დისკრიმინაციას.
კანონმდებლობის საპირისპიროდ, გასაუბრებაზე დასმული შეკითხვები მიმართული იყო კონკრეტული დასაქმებულის შეხედულებებსა და ქმედებებთან, რომლებიც არ უკავშირდებოდა სამსახურებრივი ვალდებულებების შესრულებას ან ხარისხს. შემფასებელი კომისიის წევრთა უმრავლესობას დარგობრივად არავითარი შეხება არ ჰქონდა კულტურასა და მეცნიერებასთან“, – ვკითხულობთ ანგარიშში.
დოკუმენტში ცალკე შემთხვევად არის გამოყოფილი ჩუბინაშვილის კვლევითი ცენტრის დავა კულტურის სამინისტროს წინააღმდეგ - ამ საქმეში ცენტრის სამეცნიერო საბჭო იბრძვის იმისთვის, რომ არ შეეზღუდოს ხელმძღვანელის არჩევის უფლება და არ დაეკისროს ვალდებულება, სამინისტროსთან შეათანხმონ ცენტრის დირექტორობის კანდიდატურები.
საია ასახელებს კონკრეტულ პრობლემებსაც, რასაც ადგილი ჰქონდა როგორც ეროვნულ მუზეუმში, ისე კულტურული მემკვიდრეობის სააგენტოში ჩატარებული რეორგანიზაციის დროს.
რეორგანიზაციის პროცესში, კომპეტენციის დამდგენ კომისიასთან გასაუბრების დროს, კონკრეტულ ადამიანებს არ მიეცათ საშუალება, ჩაეწერათ გასაუბრების პროცესი. გასაუბრების ოქმები არც მუზეუმს და სააგენტოს შეუდგენია;
სამართლებრივი დავის შესაძლებლობის შესამცირებლად, სამინისტრო გათავისუფლებულ თანამშრომლებს არ აწვდის იმ ინფორმაციას, რისი გაცემის ვალდებულებაც კანონით აქვს დაკისრებული - მაგალითად, სამინისტრომ რამდენიმე თანამშრომელს არ მისცა მათი გათავისუფლების ბრძანებაც კი;
გასაუბრებების ნაწილს ესწრებოდა მინისტრი, რომელიც მხოლოდ კითხვებს სვამდა და არ აფასებდა კონკრეტული პირების კომპეტენციას - მათ ქულებს უწერდნენ კომისიის ის წევრები, ვისაც არ ჰქონდათ კითხვები გასაუბრებაზე მყოფ ადამიანებთან;
გასაუბრებებზე პროფესიული საკითხების ნაცვლად განიხილებოდა გასაუბრებაზე გამოცხადებული ადამიანების ფეისბუკპოსტების შინაარსი.
საია პრობლემად მიიჩნევს გაჭიანურებულ სამართალწარმოებასაც, რასაც კულტურის სფეროდან გათავისუფლებული ადამიანები სასამართლოში აწყდებიან.
ათობით სარჩელიდან, რომლებიც კულტურის სფეროდან გათავისუფლებულმა ადამიანებმა სახელმწიფოს წინააღმდეგ სასამართლოში მას შემდეგ შეიტანეს, რაც მინისტრი თეა წულუკიანი გახდა, გადაწყვეტილება მხოლოდ რამდენიმეზეა გამოტანილი. უმეტეს შემთხვევაში სასამართლო სამსახურიდან გათავისუფლების უკანონობას ადგენს.
სამინისტრომ კულტურული მემკვიდრეობის სააგენტოსა და ეროვნულ მუზეუმში ჩატარებული რეორგანიზაციის შემდეგ ცვლილებები საჭიროდ მიიჩნია კინოცენტრშიც. კინოს სფეროს წარმომადგენლები გამოცხადებულ რეორგანიზაციის პროცესს თითქმის ერთი თვეა სისტემატურად აპროტესტებენ.